Өткен жылы Атырау облысындағы теміржол машина жасау саласының дамуына серпін беріп, қызметін бастаған вагон құрастыру зауыты сыйымдылығы 3 мың тонна болатын сұйытылған газ сақтайтын қойма салып жатыр. Бұл туралы Атырау облыстық кәсіпкерлік және өнеркәсіп басқармасының бөлім басшысы Ақбөбек Шарғабаева айтты, - деп хабарлайды Өңірлік коммуникациялар қызметі.
Қойма құрылысы осы жылы аяқталады деп жоспарланып отыр. Құны 7 миллиард теңге болатын жоба іске асқаннан кейін тұрақты 60 жұмыс орны құрылмақ.
- Алдағы уақытта «Тексол Транс» ЖШС вагон зауытын әрі кеңейтуді жоспарлап отыр. Атап айтқанда, өндіріске қажетті қосалқы бөлшектерді, вагонның басқа да түрлерін жасап шығармақ. Мұның бәрі өңірдегі теміржол-көлік саласының өркендеп, елді жұмыспен қамтуға, экономиканың дамуына өз септігін тигізеді, - деді Ақбөбек Шарғабаева.
Еске сала кетейік, вагон құрастыру зауыты 2024 жылы іске қосылды. Жылына 6 мың вагон шығаруға қауқарлы ғимарат бүгінде 180 адамды жұмыспен қамтып отыр. Компания вагондар мен цистерналар шығарып, жөндеу және техникалық қызмет көрсетуге арналған барлық инфрақұрылымды қамтитын вагон жасау кластерін дамытпақ.
