Атырау қаласында «Талшын» инклюзивті театрының «Өкінбе сен» атты спектаклінің премьерасы өтті. Бұл — жай ғана қойылым емес, көрерменмен рухтың беріктігі, қабылдау және ең ауыр сынақтардан кейін де жалғасатын өмір туралы ашық әңгіме.
Бұл жолы сахнада рөл емес — өмірдің өзі көрсетілді.
«Өкінбе сен» — мүмкіндігі шектеулі жандардың, соның ішінде «Біз де адамбыз» қоғамдық қорының қатысушыларының шынайы өмірлік оқиғаларына негізделген авторлық қойылым.
Барыс есімді жас кейіпкердің тағдыры арқылы көрермен бір сәттің ішінде барлығы қалай өзгеріп кетуі мүмкін екенін көреді: бір оқиға, бір жарақат, мүгедектер арбасы. Алайда бұл — соңғы нүкте емес. Бұл — саналы әрі мәнді жаңа өмірдің бастауы.
Инклюзивті «Талшын» театрының актері Жасұлан Мырзатайұлының айтуынша, спектакль ең алдымен қиын өмірлік жағдайға тап болған жандарға арналған.
«Қандай қиындық болса да, сынбау маңызды. Көп адам өз-өзіне тұйықталып, үйден шықпай, арбаға таңылып қалады. Мүмкін, осы қойылымды көргеннен кейін олар өмірге, жақындарына деген көзқарасын өзгертіп, мақсат қойып, үйден шығып, толыққанды өмір сүруге ұмтылар», — деді актер.
«Талшын» инклюзивті театры екі жылдан бері жұмыс істеп келеді. Осы уақыт ішінде ұжым көрерменге комедия және драма жанрларындағы бірқатар қойылымдарды ұсынды. Олардың қатарында «Бір түп алма ағашы», «Әпке», «Құдағилар», «Күшік күйеу» спектакльдері бар. Ал «Өкінбе сен» — театр ұжымының бесінші туындысы.
«Біз де адамбыз» қоғамдық қорының жетекшісі Гүлназ Космурзиева бұл қойылымның терең жеке сипатқа ие екенін атап өтті.
«Бұл — арнайы сценарийі жазылған авторлық спектакль. Көптеген сәттер біздің өмірімізден, соның ішінде менің жеке тарихымнан алынған. Команда мүшелерінің тағдырлары бір-біріне ұқсас. Бүгінгі қойылым ауыр кезеңді бастан өткеріп жатқан адамдар үшін өмірдің мұнымен бітпейтінін, оның жалғасатынын түсінуге жол ашатын бастапқы нүкте бола алады», — деді ол.
«Талшын» инклюзивті театры 2024 жылы «Біз де адамбыз» қорының жанынан құрылды. Жоба «Теңізшевройл» компаниясының қолдауымен жүзеге асырылуда және мүмкіндігі шектеулі жандардың өз-өзіне сенуіне, сахнаға шығуына, өнермен қауышуына әрі қоғамның толыққанды мүшесі ретінде сезінуіне бағытталған.
«Өкінбе сен» — аяушылық туралы емес. Бұл — күш, қабылдау және әр адамның өз өмірінде жаңа парақ ашуға құқығы бар екені туралы қойылым.
