Бүгінгі Конституцияға енгізіліп жатқан тұжырымдамалық өзгерістер – жай ғана құқықтық түзетулер емес, бұл – жарқын өмірге бетбұрыс. Мен бұл жаңаруды елдің ертеңіне деген жауапты әрі нақты қадам деп бағалаймын.
Жаңа Преамбулада адам құқықтары мен бостандықтарының мемлекеттің басты басымдығы ретінде жариялануы – Әділеттілік, Заң мен Тәртіп қағидаттарының нақты орныққанын көрсетеді. Бірлік пен ынтымақтастық, ұлтаралық және дінаралық келісімнің мемлекет негізі ретінде бекітілуі – көпұлтты Қазақстан үшін аса маңызды құндылық. Егемендік пен Тәуелсіздік, аумақтық тұтастықтың өзгермейтін құндылықтар қатарында айқындалуы – ата-бабадан аманат болған жер мен елге деген адалдықтың заң жүзінде нығаюы. «Мемлекеттік биліктің бастауы – халық» деген тұжырым да ел үні мен еркін таңдауына берілген әділ баға. Ата Заңда білім мен ғылымға, мәдениет пен инновацияға басымдық берілуі – болашақтың кілті адами капиталда екенін айғақтайды. Ал цифрландыру дәуірінде азаматтардың құқықтарын цифрлық ортада қорғау нормасының енгізілуі – уақыт талабына сай шешім. Дін мен мемлекеттің ара-жігінің нақтылануы, білім беру жүйесінің зайырлы сипатының бекітілуі, неке туралы дәстүрлі ұстанымның Конституция деңгейінде айқындалуы – қоғамның рухани негізін сақтауға бағытталған. Қорыта айтқанда, бұл өзгерістер елдігімізді бекемдеп, адам құқығын биік қойған, болашаққа сеніммен қарайтын Қазақстанның берік құқықтық тұғыры деп білемін.
Жәнібек КЕНЖИН,
аудандық мәслихат депутаты
