Таяуда Польша елінде дзюдо күресінен жасөспірімдер арасында Еуропа кубогы сарапқа салынған байрақты бәсеке өтті. Бұл жарысқа әлемнің 34 елінен жас дзюдошылар қатысып, үш күн бойы татами төрінде кім мықтыны анықтады.
Аталмыш додада 55 келіде ел намысын қорғаған жерлесіміз Ерхан Мұрат алғашқы белдесулерінде Сербия, Польша, Украина елінің дзюдошыларын ұтқанымен жартылай финалда француздық балуаннан айласын асыра алмады. Ал, қола медаль үшін болған тартыста тағы бір Франция елінің балуанымен белдесіп, таза жеңіске жетті. Айта кетер жайт - бұған дейін 50 келі салмақта өнер көрсетіп жүрген Ерхан осы жолы 55 келі салмақта бағын сынап, шын мықтыға тұсау жоқ екендігін дәлелдеді. Ерханның дәл осындай байрақты бәсекеде жүлдеге ілінуіне Сағыз балалар-жасөсіпірдер спорт мектебінің жаттықтырушысы Сәлімгерей Нұрболғановтың еңбегі зор екендігін айта кеткен жөн.
Дулат БЕРІК
