Бурабайда өткен Ұлттық құрылтайда Мемлекет басшысы Қасым-Жомарт Тоқаев туризм аймақтардың дамуына серпін беретін салаға айналуға тиіс екенін атап өтті. Өңірлерде өтетін елішілік һәм халықаралық іс-шаралар сол өңірдің туристік әлеуетінің артуына ықпал ететінін айтты.
«Туризм – бизнес пен экономиканың тұтас саласы. Мамандарды даярлау қажет. Табиғи байлығымен, жан-жануарлар дүниесімен бүкіл әлемге танымал еліміздің биологиялық әралуандығын қорғау айрықша маңызды міндетке айналды. Ақмола облысының орасан зор туристік әлеуеті Шучинск – Бурабай аумағымен ғана шектелмейді. Демалыс аймағы ретінде мүмкіндігі мол Зеренді, Сандықтау, Ақкөл және басқа да жерлерді жан-жақты дамыту қажет. Аймақтағы көрікті әрі киелі орындардың бәрі өзара кіріктіріліп, үйлестірілген ауқымды туристік кластер қалыптастыру маңызды», деді Президент. Мемлекеттің дамуына зор қарқын қосатын бұл салада әлі де атқарылар шаруа жеткілікті.
Осы саланы өрістету арқылы өңірлерде жаңа жұмыс орнын ашудың мүмкіндігі де мол. Шалғайдағы ауылдарда ірі өндіріс орны, зауыттардың салына бермейтіні белгілі. Сол ауылдардың тұмса табиғаты, тарихи, мәдени орындары туристердің көптеп келетін тұрағына айналуы мүмкін. Әр келген туристің төлейтін қаражаты ауыл бюджетіне түседі. Әлемдік тәжірибеде мұндай тәсіл ертеден қолданылады. Елімізде кейінгі 7-8 жылдың ішінде ғана қарқынды дамып, қолға алына бастады. Оның жарқын мысалы – Алматы облысы Кеген ауданындағы Саты ауылы. Әйгілі Көлсай көлдеріне іргелес орын тепкен ауыл былтыр Дүниежүзілік туристік ұйымның (UNWTO) үздік ауыл аталымын алды. Бұл ауылда бірнеше қонақүй бар, одан сырт, тұрғындардың барлығы дерлік туризм саласында несібесін тауып отыр. Осы модельді еліміздің өзге өңірлеріне де енгізу мақсатында түрлі экспедициялық сапар, семинар ұйымдастырамыз. Жылда ауылдарды аралап, жергілікті халықпен жүздесіп, тусырап жатқан далаға туризм тамыр тартса, табыс көзі ашылатынын айтамыз. Тұрғындардың оқу курстарынан өтуіне жағдай жасаймыз. Қонақүй бизнесі, туризм сервисін заман талабына сай нығайтуға жол сілтейміз. Бүгінде осындай семинар, тренингке қатысып, біліктілігін арттырған ауыл тұрғындарының саны мыңға жетті. Елуге тарта жаңа туристік орын ашылып, келушілердің қызығушылығын арттырды.
Мемлекет басшысы Ұлттық құрылтайда атап өткендей, өңірлерде туризмді дамыту бағытындағы маңызды іс-шараларды жүйелі ұйымдастыру керек. Бұл ретте ойын-сауықтық жиындар емес, туристер тартуға серпін беретін мағыналы басқосулар жиі өтуі керек. Тек ауылдық жерлерде емес, ірі мегаполис, облыс орталықтарында өтетін іс-шаралар да туристерді тартудың көзі болуға тиіс. Мысалы, Түркістан қаласы туристік мекен болғанына қарамастан, күздің соңы, қысқа қарай туристер азаяды. Оның салқыны қонақүйлерге, басқа да туристер аралайтын орындарға айтарлықтай әсер етеді. Күз мезгілінің аяғына қарай өтетін Түркістан марафоны осы олқылыққа айтарлықтай жамау болып келеді. 2 мыңнан аса қатысушы қалаға жан-жақтан жиналады. Келген қонақтар көбіне қонақүйлерге тоқтайды. Міне, осындай ауқымды шараларды әр қалада өткізу арқылы да туристерді тартуға болады.
Даниел СЕРЖАНҰЛЫ,
«Kazakh Tourism» ҰК» АҚ басқарма төрағасының орынбасары
