«Теңізшевройл» ЖШС (ТШО) өңірлік денсаулық сақтау жүйесін қолдау аясында Атырау облысының қажетіне 25 жедел медициналық жәрдем көлігін сыйға тартты.
Жаңа техника жедел жәрдем қызметінің автопаркін едәуір жаңартуға мүмкіндік береді. Әрбір көлік заманауи жабдықтармен қамтамасыз етілген, бұл тасымалдау кезеңінде-ақ жоғары деңгейде шұғыл көмек көрсетуге жағдай жасайды. Бұл демеушілік көмек науқасқа жету уақытын қысқартуға ғана емес, сонымен қатар жедел жәрдем бригадасы көрсететін қызметтің қауіпсіздігін арттыруға және медицина қызметкерлерінің еңбек жағдайын жақсартуға ықпал етеді. Бүгінде облыстық станция тәулігіне 1000-нан астам шақырту қабылдайды.
— «Жедел медициналық жәрдем көліктерін беру – бұл ТШО-ның шұғыл медициналық қызметтің материалдық-техникалық базасын нығайтуға және күн сайын адам өмірін сақтап қалатын медицина қызметкерлерін қолдауға қосқан үлесі. Біз халықтың өмір сапасын жақсартуға және өңірдің әлеуметтік инфрақұрылымын дамытуға бағытталған бастамаларды тұрақты түрде қолдаймыз», — деді ТШО Үкіметпен және жұртшылықпен байланыс бөлімінің бас менеджері Нұрмұхамед Қартабаев.
Жаңа жедел жәрдем көліктері ең алдымен облыстың шалғай елді мекендері мен ауылдық аумақтары үшін ерекше маңызды. Мамандар атап өткендей, облыстық жедел жәрдем станциясында арнайы техниканы беру – бұл жай ғана автопаркті жаңарту емес, денсаулық сақтау жүйесінің тұрақты дамуына, халықтың жедел жәрдем қызметіне деген сенімін арттыруға және медициналық бригадалардың қауіпсіз жұмыс ортасын құруға қосылған үлес.
— «Жедел медициналық жәрдем автопаркін жаңарту біздің жұмысымыз үшін аса маңызды. Біз ТШО-ға қолдауы және Атырау облысының денсаулық сақтау саласын дамытуға қосқан нақты үлесі үшін алғыс білдіреміз», — деді Атырау облыстық жедел медициналық жәрдем станциясының директоры Айбек Орынбасарұлы.
Арнайы медициналық техниканы беру ТШО-ның Атырау облысы Денсаулық сақтау басқармасымен ұзақ мерзімді серіктестігінің кезекті кезеңі болды. Бұл серіктестік әлеуметтік саланы дамытуға, денсаулық сақтау жүйесінің тұрақтылығын арттыруға және өңір тұрғындарын сапалы әрі уақытылы медициналық көмекпен қамтамасыз етуге бағытталған.
ТШО дәстүрлі түрде инклюзияны, салауатты өмір салтын және тең мүмкіндіктерді дамытуға ықпал ететін әлеуметтік бастамаларды қолдауға баса назар аударады. 1993 жылдан бері ТШО Атырау облысы халқы мен қызметкерлеріне арналған түрлі әлеуметтік жобаларды қаржыландыруға 3,6 миллиард АҚШ долларынан астам қаражат бөлді.
