«Арман» мәдениет үйінде «Еңбегіне - тағзым, жетістікке - құрмет» тақырыбында жұмысшы мамандықтар жылына орай «Жыл үздігі - 2025» салтанатты шарасы өтті.
Оған аудан әкімі, аудандық мәслихат төрағасы, аудан әкімінің орынбасарлары, бөлім, мекеме басшылары мен ауыл тұрғындары қатысты. Салтанатты шара «Жұлдыз-ай» үлгілі би ұжымының «Шляпа» биімен ашылды. Бұдан соң сахнаға көтерілген аудан әкімі Қанат Әзмұханов ауданның әлеуметтік экономикалық дамуына сіңірген еңбегі үшін Қызылқоға ауданының «Құрмет грамотасымен» аудан әкімі аппаратының жалпы бөлімнің бас маман-есепшісі Бағытжамал Бисенғалиеваны және бірнеше саланың үздігін марапаттады. Сол сияқты аудандық мәслихат төрағасы Толқын Бейсқали мен аудандық қоғамдық кеңес төрағасы Өтеуғали Дүйсәлі де жыл ішінде еселі еңбегімен көзге түскен үздіктерге арнайы диплом мен статуэтка табыстады. Шара барысында барлығы 29 саланың үздіктері ұлығыланып, мәртебелері асқақтады. Салтанатты жиын одан әрі «Арман» мәдениет үйі өнерпаздарының мерекелік концертімен жалғасын тауып, олар ән мен биден көпшілікке шашу шашты. Осылайша жылдың қорытынды шарасы өз мәресіне жетіп, жиналған көпшілік үздіктерді ұлығылап, құтты болсын айтып тарқасты.
Дулат МӘТЖАН
