Білім және ғылым министрі Асхат Аймағамбетов көпбалалы және аз қамтылған отбасылардың балалары 5 мың білім грантына қалай ие бола алатынын айтты.
Министрдің сөзінше, білім гранттары биыл 1 қыркүйектен бастап бөлінеді. "Негізгі талаптар: талапкер ҰБТ тапсыруы, шекті балдан өтуі, көп балалы және атаулы әлеуметтік көмек алатын отбасыдан шыққан балалар болуы тиіс. Осындай балалар 5 мың грантқа үміткер бола алады",- деді Аймағамбетов. Министр биыл бөлінген 53700 білім гранты талапкерлерге берілгеннен кейін ғана ең алдымен осы 5 мың грант үлестірілетінін айтты. "Алдымен осы гранттарды бөлу жүргізіледі.
1 тамыздан кейін грант тізімі белгілі болады. Грантқа ілікпеген осы санатқа жататын талапкерлер 5 мың грантқа өтініш жаза алады. Тест тапсырып, шекті балл жинап, өтініш жазып, содан кейін жинаған балына сәйкес грант бөлінеді",- деді білім және ғылым министрі Үкімет үйінде өткен баспасөз мәслихатында. Ол гранттарды бөлуде ешқандай сыбайлас жемқорлық қаупі жоқ деп сендірді. 26 маусым күні мемлекет басшысы Қасым-Жомарт Тоқаев көп балалы және аз қамтылған отбасылардың балаларына 5 мың білім гранты бөлуді тапсырған болатын.
Сурет: Ашық дереккөз
