Таяуда, редакциямызға ақын, сазгер, журналист Қалидолла Ізекенұлы келді. Өзінің біраздан бері көрінбей кеткен себебін түсіндірген Қалидолла аға жай келмепті, «Қадірлі қарашаңырақ – «Қызылқоға» газетінің редакциясына» деген қолтаңбасын жазып, баспадан шыққанына көп бола қоймаған жаңа кітабын сыйға тартуға ала келіпті. Бұл ақын ағамыздың біз білетін жетінші кітабы.
Содан болуы керек, жаңа кітаптың атын «Жетіген» деп қойыпты. Кітап үш бөлімнен тұрады. «Алғысөздер» атты бірінші бөлімге Қалидолла Ізекенұлының шығармашылығы туралы қалам тербеген Қазақстанның Еңбек Ері Илья Жақанов, академик, жазушы, журналист, «Құрмет» орденінің иегері Төлеген Жаңабайұлы, Ақтөбе қаласында тұратын сыныптас досы Тарас Есжановтардың очерк, мақалалары топтастырылса, екінші бөлімге әр жылдары жазған өлеңдері, үшінші бөлімге әндері нотасымен бірге енгізіліпті.
Жалпы, кең ауқымдылық, терең ой, шынайы сезім, суреткерлікке толы өлеңдері, туған жер, өскен орта, қоғам, заман, ел тарихындағы айтулы тұлғалар, қанаттас жүрген замандастары туралы терең толғаныстары арқылы жыр сүйер қауымның жүрегінен жол тапқан Қалидолла ақын жанға жігер сыйлайтын әсем әндерімен де халықтың құрметіне бөленген сазгер. Осы орайда, Қазақстанның Еңбек Ері Илья Жақановтың: «Айт, айтпа, Қалидолла болмысымен талантты жан. Кешегі советтік кезеңдегі лирикалық әндердің ғажайып үлгісін бойға дарытқан өрелі, өрісті өнердің иесі. Ол әшейін ән дүниесіндегі оп-оңай айтыла салатын «әуесқой» емес, әр әні ұлттық колоритке тұнған нағыз халық композиторы» деп баға беруі шын дарын иесіне берілген әділ баға екендігі сөзсіз. Ендеше, халық композиторының жаңа кітабы да оқырмандардың рухани қазынасын молайта түседі деген сенімдеміз.
Бауыржан АМАНҰЛЫ
