АСТАНА. KAZINFORM — Алматы қаласында тұратын, Екінші дүниежүзілік соғыс ардагері Василий Зинченко 101 жасқа толды. Ол ерлігі мен батырлығы үшін «Отан соғысы», «Қызыл Жұлдыз» ордендерімен марапатталған.
Сондай-ақ «Сталинградты қорғағаны үшін» және «Германияны жеңгені үшін» төсбелгілерін кеудесіне таққан.
Қарт майдангер соғыс даласында Сталинградты қорғауға, Польша мен Украинаны азат етуге қатысқан. Берлин шабуылының бел ортасында жүріпті. Бүгінде ол соғыс жылдарын күрсіне еске алады.
- Польшаға кірген кезде мен барлаушы болдым. Мені бір апта ұстады, содан кейін шақырып, соғысқа аттандырды. Біз Польшаны толық басып өттік, - дейді Василий қария Jibek joly арнасы тілшісіне.
Соғыстан кейін Алматыға оралған В.Зинченко жергілікті сүт комбинатында ұзақ жыл еңбек етеді. Отбасында үш ұл мен бір қыз өсірді. Бүгінде ол жеті немеренің, он үш шөберенің және екі шөпшектің сүйікті атасы.
101 жасқа толған Василий Зинченко - тек майдангер ғана емес, тұтас дәуірдің куәгері. Оның ерлікке толы ғұмыры кейінгі ұрпақ үшін тағылым мен құрметтің үлгісі.
Айта кетейік, Мемлекет басшысы «Ұлы Отан соғысындағы Жеңіске 80 жыл» медалі туралы Жарлыққа қол қойған болатын.
