Ұзақ жылдан бері су келмей, аңқасы кебе бастаған Ойыл өзені өткен аптадан бастап тасып, қызылқоғалықтарды қуанышқа бөлеуде.
Қазіргі таңда, 15 миллион текше метр су келіп, ол «Ералы» су торабы арқылы ауылдық округтерге шығарылуда. Жауапты мамандар бұл Ащыойыл өзенінің суы екендігін, әлі Ақтөбе облысындағы «Тамдыкөл» су өндіру жүйесі ашылып, одан да су келетіндігін айтуда. Демек, Ойыл өзені әлі де тасиды деген сөз. Соған қарамастан, қазірдің өзінде өзеннің арнасы толып, ескі жылғаларға су шығуда.
Соған орай, ауданда қауіпсіздік шаралары қолға алынуда. Аудан әкімінің орынбасары Айдулат Кенжебековтің айтуынша Миялы, Жангелдин, Ойыл, Көздіғара, Тасшағыл, Жамбыл, Қызылқоға ауылдық округтерінде бөгеттер биіктетіліп, еріктілер қапшықтарға құм толтыруда. Бұдан бөлек, «Ералы» су торабындағы алты қақпаның төртеуі ашылып, ауылдар мен шабындық жерлерге су шығарылуда. Сондай-ақ, Жарыпшыққан арқылы Тайсойғанға да су жіберілді. Қазіргі таңда, аталмыш су торабында аудан әкімі бастаған топ жұмыс жасауда.
