Бүгін аудан өміріндегі маңызды мәдени оқиға — өңірдің бай тарихына ие «Серпер» газетінің 95 жылдығы салтанатты түрде аталып өтті. Мерейтой аясында аудан тұрғындары мен жастарға арналған түрлі іс-шаралар ұйымдастырылды.
Атап айтқанда, аудандық футбол турнирі, жастар арасында интеллектуалды куиз, оқушылар арасында өлең жазудан байқау, сондай-ақ облыстық деңгейдегі ақындар айтысы өтті. Мерекелік жиында баспасөз саласының ардагерлері мен үздік журналистердің еңбегі еленіп, арнайы марапаттар табысталды. «Серпер» газеті — өңірдің айнасы, халықтың шежіресі. 1929 жылы алғаш рет жарық көрген басылымның атауы уақыт талабына сай төрт рет өзгергенімен, мазмұны мен мақсаты өзгерген жоқ. Қазіргі таңда газет 5 мыңға жуық данамен таралып, қызығушылығын жоғалтпай, тұрақты түрде халық қолына жетіп келеді. Жүз жылдық белеске қадам басқан ұжымға шығармашылық табыс пен жаңа жетістіктер тілейміз!
Ақтілек Базарбаева
