Атырауда жылдың ең алғашқы жүгіру жарысы — «Winter Run 2026» марафоны ұйымдастырылды. Шара Атырау облысы дене шынықтыру, спорт және туризм басқармасының қолдауымен, Run Club Atyrau клубының бастамасымен өтті, - деп хабарлайды Өңірлік коммуникациялар қызметі.
Биылғы жарысқа 220 қатысушы тіркеліп, барлығы 5 шақырымдық қашықтықта бақ сынады.
– Біздің негізгі мақсатымыз – халықты белсенді өмір салтына баулу. Жарыс туралы ақпарат жарияланған сәттен бастап қызығушылық жоғары болды. Бұл біз үшін үлкен шабыт, – деді ұйымдастырушы Гаухар Бекетаева.
Жарыс қорытындысы бойынша ерлер арасында Еркебұлан Аташев жеңімпаз атанса, әйелдер арасында Тұрсынай Сұлтанғалиева мәреге бірінші болып жетті.
– Керемет әсер алдым. Жайық өзенінің жағалауымен жүгіру ерекше сезім сыйлады. 2020 жылдан бері жүгірумен айналысып келемін. Ұйымдастырушыларға үлкен алғыс, – деді жеңімпаз Еркебұлан Аташев.
Айта кетейік, марафонға қатысушылардың жас ерекшелігі әртүрлі болды. Жүлдегерлер қатарында 16 жастағы жасөспірімдермен қатар, 76 жастағы тәжірибелі әуесқой спортшы да бар.
