Ауданымыздың тыныс-тіршілігін бұқара халыққа жеткізіп қана қоймай, миллиондаған ұрпақтың тәрбиелі де тәлімді болып өсуіне, рухани бай болып қалыптасуына ерекше үлесін қосып келе жатқан басылым, ол – «Қызылқоға» газеті.
Қазіргі таңда көптеген адамнан «Газетке не үшін жазыламыз?», «Бәрі әлеуметтік желіде бар ғой» дейтін әңгімелерді жиі естіп жатамыз. Бұл қате. Өйткені, газеттің берер тәлімін, рухани байлығын, қазақи әдемі сөз өрнектерін әлеуметтік желі бере алмайды. Әлеуметтік желіде ой-пікірлер асығыстықтан үстірт айтылуы мүмкін. Бұл тіл мәдениетіне нұқсан келтіреді. Ал газет осы уақытқа дейін сол тіл мәдениетін қалыптастырып қана қоймай, оны жетілдіріп келеді. Газетті өз басым жақсы оқимын. Газет –журналдардан хабарымыз болмаса, кәсіптің қыр-сырын ұқпас едік. Газет - кешегі мен бүгінгінің айнасы және заңдық күші бар құжат. Аудандық газеттің «Тарих», «Аудан тынысы», «Ақпараттар ағыны», «Сәті түскен сұхбат», «Сараптама» секілді айдарлармен берілетін мақалаларды отбасымызбен сүйсіне оқып, талдап отырамыз. Тағылымы мен мәні зор мақалалар жас ұрпаққа өз өлкесінің тарихын білуіне үлкен септігін тигізеді деп ойлаймын. Ендеше, сенімді әрі шынайы ақпаратты алу үшін, елінің және өзінің тағдырына бейжай қарамайтын ойлы оқырман газетке жазылудан қалыс қалмасы анық.
Нұрбану МҰҚАНОВА,
«Нұр-Шуақ» бөбекжай балалар
бақшасының әдіскері
