Оның ішінде тұрақты бос жұмыс орындарына 10170, субсидияланған жұмыс орындарына 4700, жастар практикасына 2280, «Күміс жас» жобасына 1507 адам қамтылады, деп хабарлайды AtyrauPress тілшісі.
Сонымен қатар «Бастау-Бизнес» арқылы 1985, онлайн skills арқылы 1 880 адамды оқыту жоспарланды. Бұл туралы Өңірлік коммуникациялар қызметіне облыстық жұмыспен қамтуды үйлестіру және әлеуметтік бағдарламалар басқармасының бас маманы Дина Әбішева мәлім етті. 2025 жылдың 1 сәуіріне дейін өңірдегі мансап орталықтарына жүгінген 20 мыңнан астам адамның 12 758-і әртүрлі әлеуметтік қолдау шараларымен қамтылды. 6 680 адам жұмыс тауып, 1 690-ы тұрақты қызметке орналасты.
- Жыл басынан бері жастардан 4 400-дей адам хабарласып, олардың 1 942-сі жұмыспен қамтылды. Сонымен қатар 407 жас онлайн оқудан сертификат алып, 107 адам кәсіпкерлік негіздеріне оқытылды. 55 бос жұмыс орындар жәрмеңкесі мен 100 мәрте ашық есік күнін өткізу жоспарланған болса, бүгінде 5 жәрмеңке мен 43 ашық есік күні ұйымдастырылды. Мансап орталықтарына жүгінген 8 240 әйелдің 3052-сі жұмыспен қамтылды. 784 әйел онлайн оқудан өтіп, 258-і кәсіпкерлікке бағытталған оқуға қатысты. Мүгедектігі бар 646 азаматтың 616-сы әлеуметтік қолдаумен қамтылып, оның ішінде 62-сі тұрақты жұмысқа орналасты, 240-ы қоғамдық жұмысқа жіберілді. 2024 жылғы №265 облыс әкімдігінің қаулысына сәйкес, мүгедектігі бар азаматтар үшін 722 мекемеге квота бекітілді, - деді Д. Әбішева.
50 жастан асқан жұмыссыз азаматтарға арналған «Күміс жас» жоба аясында 1 507 адамды жұмыспен қамту жоспарланса, үш ай ішінде бұл жоспар 67 пайызға орындалды. Жоба еңбек өтілін жинауға және зейнетақы жарналарын толықтыруға мүмкіндік береді.
Аман ШАМАР
