«Қазгидромет» РМК дерегінше, 14 желтоқсанда Атырау облысында қар, боран және көктайғақ күтіледі. Облыстың солтүстігінде қалың қар жауып, желдің жылдамдығы 15–20 м/с-қа жетеді, екпіні 28 м/с-қа дейін күшеюі мүмкін. Ал облыстың оңтүстігінде жел екпіні кей уақытта 30 м/с-тен асады.
Полиция департаментінің мәліметінше, қолайсыз ауа райына байланысты Атырау–Орал, Атырау–Ақтөбе, Атырау–Доссор–Бейнеу бағыттарындағы тас жолдар уақытша жабылды. Қалған бағыттарда көлік қозғалысы полиция қызметкерлерінің сүйемелдеуімен жүргізілуде. Атырау қаласында көктайғақтың алдын алу мақсатында жолдарға арнайы реагент себу жұмыстары басталды. Бұл жұмыстарға 5 бірлік құрама жол машинасы тартылып, қала көшелері, көпірлер және ауылдық округтер жолдарын қамтуда. Жол қозғалысына қатысушылардан қауіпсіздік талаптарын сақтап, жылдамдықты асырмауды және арақашықтықты қатаң ұстануды сұраймыз.
