Биыл атыраулық түлектер медицина, ауылшаруашылығы, педагогика, дінтанушы, теолог, исламтанушы мамандықтары бойынша облыс әкімінің грантына ие бола алады.
Бұл туралы облыстық білім беру басқармасы басшысының орынбасары Айнагүл Дүйсекенова хабарлады. – Өңірдегі кадр тапшылығына байланысты тиісті басқармалардан сұраныстар алынды. Әкім грантына қабылданатын құжаттар тізімі мемлекеттік гранттардың тізімімен бірдей. Кәмелет жасқа толған болса түлектердің өздері, толмаған жағдайда ата-анасы өтініш бере алады. Әкім грантына биылғы және бұрынғы жылы мектеп бітірген, колледж түлектері үміткер болады. Құжат қабылдау 13-20 шілде аралығында өтініш бере алады, – деді Айнагүл Дүйсекенова. Айта кетейік, құжат қабылдау кезінде түлектердің мамыр-маусым айындағы ҰБТ қорытындысы, әлеуметтік санаты, республикалық, халықаралық байқаулардан алған жүлделері де ескеріледі. Өткен жылы Атырау облысы әкімінің 107 гранты бөлінген болатын.
Нұргүл Насыр
