Еліміздің аграрлық саласын дамытуда еңбек адамдарының рөлі ерекше. Ауыл тіршілігінің күретамыры – мал шаруашылығы десек, осы саланың тыныс-тіршілігіне жан бітіріп тұрған маңызды мамандықтардың бірі – ветеринария. Бұл сала – мал денсаулығының ғана емес, халықтың азық-түлік қауіпсіздігінің де кепілі. Осындай жауапкершілігі зор кәсіпті ауылдан шыққан азамат Нұрболат Алпысбаев абыроймен атқарып келеді.
Махамбет ауданына қарасты Ақжайық ауылында туып-өскен Нұрболат бүгінгі таңда елді мекен тұрғындарына ең қажетті маман – ветфельдшер болып еңбек етуде. Ол 2016 жылы Оңайбай Көшеков атындағы Атырау аграрлы- техникалық колледжін бітіріп, сол жылы әскер қатарына аттанады. Отан алдындағы борышын өтеп келген соң көп ұзамай туған ауылына оралып, жергілікті ветстанцияға жұмысқа орналасады.
– 2017 жылы әскерден келісімен бірден өз ауылымдағы ветстанцияға жұмысқа орналастым. Содан бері 8 жылдан бері осы саладамын. Жылына екі рет әр малдан қан алып, түрлі ауруларға қарсы екпе жасаймыз. Ауырған малға шақырту түссе, иесіне көмектесіп, ем-домын жасаймыз. Қазір жұмысымыз физикалық тұрғыдан ауыр, иесі көмектеспеген жағдайда малдың өзін де өзіміз ұстауға тура келеді,- дейді Нұрболат күнделікті жұмыс барысын баяндап.
Мал дәрігерінің қызметі – тек екпе салып, қарапайым ем жасаумен шектелмейді. Олар – төрт түліктің амандығын сақтап, ауыл халқының басты күнкөріс көзіне айналған шаруашылықтың тұрақты дамуына үлес қосып жүрген мамандар. Ветеринария тек тәжірибелік сала емес, ғылымға негізделген, үнемі даму мен қырағылықты талап ететін кәсіп. Бүгінде ауыл жастары қалаға кетуді көбірек қалайды. Алайда Нұрболат ауылда жүріп-ақ өз орнын тауып, қоғамға шынайы пайда келтіруге болатынын дәлелдеп отыр.
– Бұл мамандықты таңдауыма сенім себеп болды. Кішкентайымнан мал бағып өскен соң жануарларға жақын болдым. Әкем де малшыларға жиі көмек көрсететін. Мамандық таңдаған кезде әкем мені бірден қолдады. Ауыл жастарына айтарым - ештеңеден қорықпаңыздар. Өз қалауларыңызды кейінге ысырып жүрмеңіздер. Ауылда да үлкен мүмкіндіктер бар. Мал дәрігерлігі – сұранысы жоғары сала. Қазір көп қалалықтар ауылға көшіп жатыр, себебі мұнда таза ауа, кеңдік пен тыныштық бар. Бұл – үлкен артықшылық, – деп жастарға кеңес айтты ол.
Ауылдық жерде еңбек ететін жұмысшы мамандықтардың, әсіресе ветеринарлардың ел өміріндегі маңызы зор. Нұрболат Алпысбаевтың еңбек жолы – бүгінгі жастарға үлгі боларлық өмір. Ол – ауылдан шыққан, білім алып, туған жеріне қайта оралып, ел игілігі үшін қызмет етіп жүрген нағыз еңбек адамы.
Қ.АЙТҚАЛИЕВ
