Аудандық ішкі саясат бөлімі мен «Қоғамдық келісім» КММ-нің ұйымдастыруымен 15 мамыр-Халықаралық отбасы күніне орай  аудандық орталық кітапханада «Егіздер – ерекше жандар» атты егіз жандармен кездесу өтті.

Шараға Самат-Самал, Жансұлу-Айсұлу, Мадина-Сабина, Рахым-Расул, Дана-Зере есімді егіздер қатысты. Егіздермен танысудан басталған әңгіме әрі қарай егіздердің ерекшелігі, оларға өзге адамдардың қызығушылығы, қызықты оқиғалары, бір-бірінен айырмашылықтары, мінездеріндегі ерекшеліктері туралы өрбіді. Сонымен қатар, ғылыми тұрғыда дәлелденген сыңарлардың бір-бірін сезу қабілеттері туралы да сөз болды. Самал мен Самат бірі ата-әжені бірі әке-ананың қолында өскендіктен бір-бірімізді аса қатты сезбейміз десе, «Мадина мен Сабина бір-бірін өте жақсы сезеді, бірі ауырса екінші күні сыңарыда ауырып қалады. Бір-бірінен жырақ кетсе іздейді. Сондықтан екеуін үнемі бірге жібереміз» дейді егіздердің анасы. Кеш барысында егіз бүлдіршіндер Расул мен Рахым, Дана мен Зере өз өнерлерін көрсетті.
 Ерекше жандардың ерекшеліктері мен артықшылықтары сөз болған шара соңында аудандық ішкі саясат бөлімінің басшысы Асқар Ақтаев қатысушыларды мерекемен құттықтап, алғыс хат пен естелік сыйлық табыс етті.