Атырау облысында спорттық инфрақұрылымды дамыту жұмыстары қарқынды түрде жалғасуда. Биыл өңірде шамамен 22 жаңа спорт кешенін пайдалануға беру жоспарланып отыр.
Жобалар бұқаралық және балалар-жасөспірімдер спортын дамытуға, сондай-ақ қала мен ауылдық жерлерде дене шынықтырумен айналысуға тең жағдай жасауға бағытталған. Нысандардың орналасатын орындарын таңдауда спорттық инфрақұрылыммен жеткіліксіз қамтылған ауылдық елді мекендерге, жастарының үлесі жоғары аумақтарға және спорттық әлеуеті бола тұра заманауи нысандар тапшы аудандарға басымдық берілді. Атырау облысының дене шынықтыру, спорт және туризм басқармасының басшысы Нұрбол Сыдықовтың айтуынша, Атырау қаласында«Жұлдыз» шағынауданында және Еркінқала ауылдық округінде заманауи спорт нысандарының құрылысы жүргізілуде. Мұнда командалық және жеке спорт түрлерін дамытуға арналған әмбебап спорт залы мен көпфункционалды спорт кешені салынуда. Осындай нысандар Индер, Құрманғазы, Исатай, Махамбет, Мақат және Қызылқоға аудандарының ауылдарында да бой көтермек. Жаңа спорт кешендерінде олимпиадалық және ұлттық спорт түрлерімен шұғылдануға барлық жағдай жасалады. Атап айтқанда, бокс, еркін және грек-рим күресі, дзюдо, жеңіл атлетика, баскетбол, волейбол, сондай-ақ байдарка және каноэде есу спорт түрлері қамтылады. Атырау облысының дене шынықтыру, спорт және туризм басқармасының басшысының сөзінше, нысандар пайдалануға берілгеннен кейін жүйелі түрде спортпен шұғылданатын балалар мен жасөспірімдер санын шамамен 3 мың адамға арттыру көзделіп отыр. Қазіргі таңда Атырау облысында 800-ге жуық спорт нысаны жұмыс істейді. Олардың қатарында 8 стадион, 53 спорт кешені және 702 спорт алаңы бар.
Сонымен қатар өңірде олимпиадалық 50 метрлік жүзу бассейні, «Атырау» спорт сарайы, теннис орталығы мен мұз сарайы сияқты заманауи спорт ғимараттары қызмет көрсетуде. Бұған қоса, тұрғындарға 17 жеке спорт нысаны да қызмет ұсынады.
