Бүгінде садақ ату спорты аудан көлемінде жақсы дамып келеді. Осы бағытта, Атырау қаласында қаңтар айында бастау алған Сарайшық мергендер лигасы 19 мамыр күні қорытындыланды. Іріктеу қорытындысына сәйкес, жоғарғы лигага – 16, қосымша лигага – 16 мерген іріктелді.

Оның ішінде, төрт мерген аудан намысын қорғаған болатын. Нәтижесінде, қосымша лиганың қорытындысы бойынша Тойлыбек Қабиев ІІІ орынды иеленді.

– Садақ ату – қазақтың қанында бар өнер. Жаугершілік заманда ата-бабамыздың мінер аты белдеуде, бес қаруы кереге басында сақталып, әр ауылдың ұландары кез келген жағдайға дайын болуға машықтанғаны аян. Осы бес қарудың бірі – садақ ату өнері заманға сай қайта жаңғырып жатқаны көңіл қуантады. Осындай, мергендердің сайысын өткізудегі басты мақсат – қазақ елінде ұлттық құндылықтарды көтеру, ұмытылған дәстүрді жаңғырту. Әрине, бабамыздан аманат етілген құндылықты әр қазақтың бойына сіңіру кез келген азаматтың міндеті. Сонда ғана ел ұландарының болашағы жарқын болмақ, - дейді аудандық жастар ресурстық орталығының директоры Ризабек Амантайұлы.

Нұрсәуле ЖАУЫНБАЕВА