Қазіргі заман – мамандықтар дәуірі. Қандай мемлекет болмасын, оның дамуы мен өркендеуі ең алдымен нақты еңбекпен айналысатын адамдарға тікелей байланысты. Солардың ішінде жұмысшы мамандықтарының орны ерекше.
Қоғамның тыныс-тіршілігін қамтамасыз ететін, күнделікті өмірдің барлық саласында қажеттілікке ие бұл мамандықтар көбіне көзге көрінбей қалуы мүмкін. Бірақ олардың маңыздылығы мен қажеттілігі ешқашан төмендеген емес. Жұмысшы мамандықтар – нағыз еңбекке, кәсіби шеберлікке, тәжірибеге негізделген қызметтер. Олар – ел экономикасының қозғаушы күші. Техникалық қызмет көрсету, жөндеу, құрылыс, ауыл шаруашылығы, өндіріс орындары – мұның бәрі жұмысшы мамандардың кәсіби еңбегінің нәтижесі. Осындай мамандықтар болмаса, қоғам толыққанды дами алмайды. Бүгінгі таңда көптеген елдерде, оның ішінде Қазақстанда да, жұмысшы мамандықтарына сұраныс артып келеді. Бұл – заман талабына сай қалыптасқан заңдылық. Себебі кез келген салада өндірістік қуатты арттыру, қызмет көрсету сапасын жақсарту, жаңа инфрақұрылым салу нақты еңбек адамдарынсыз мүмкін емес. Сондықтан техникалық және кәсіптік білім беруді дамыту – мемлекет үшін басым бағыттардың бірі болып отыр. Жастар арасында жұмысшы мамандықтарына деген қызығушылықты арттыру үшін кәсіптік бағдар беру, кәсіби-техникалық білім беру сапасын жақсарту, еңбек адамын насихаттау аса маңызды. Мамандық таңдау кезінде әрбір жас өзінің бейімділігіне, қызығушылығына және болашақтағы еңбек нарығындағы сұранысқа сүйенуі керек. Қолмен істейтін нақты еңбек ешқашан ескірмейді. Қай кезеңде де шынайы еңбек адамы – құрметке лайық. Қорыта айтқанда, жұмысшы мамандықтары – қоғамның іргетасы. Бұл саланың мамандары – елдің көркеюіне, халықтың жайлы өмір сүруіне еңбек етіп жүрген нағыз патриоттар. Сондықтан жұмысшы мамандығына деген көзқарасты өзгерту, оларды қолдау және бағалау – бүкіл қоғамның ортақ міндеті.
Камилла ҚҰРМАНҒАЗИЕВА
