Дүйсенбі күні Қызылқоға ауданы Миялы ауылындағы «Арман» мәдениет үйінде Абай Құнанбайұлының туғанына 175 жыл толуына орай Абайтанушы, дінтанушы, филология ғылымдарының кандидаты, доцент, «Харекет» және «Жақсы» кітаптарының авторы Омар Жәлелмен кездесу кеші өтті.
Шараға бөлім, мекеме басшылары, кәсіпкерлермен бірге Сағыз, Ойыл ауылдық округтерінің де тұрғындары қатысты. Қоғамдық лекция негізінде өткен кездесуде кеш қонағы Абай ілімін насихаттау, отбасы құндылығын сақтау, жастарды отансүйгіштікке тәрбиелеу бағытында орамды ойлар айтып, артынша көрермендердің жастар тәрбиесі, мамандық таңдау, дін ұстану, отбасындағы ер мен әйелдің орны жайлы қойған сұрақтарына жан-жақты жауап берілді.
Аудан әкімінің орынбасары Марат Әбуов кездесу кешін қорытындылап, салмақты да салихалы әңгімесі үшін кеш қонағына алғыс айтса, «Бәйтерек» мешітінің жамағаты естелік сыйлық табыс етті.
Осы орайда, аудан халқына рухани кеш сыйлаған Омар Жәлел жеке кәсіпкер Қайырбек Баймұратовтың шақыртуымен келгендігін айта кеткен жөн.
Дулат БЕРІК
