Аудандағы ең үлкен мектептердің бірі саналатын Мұқыр орта мектебінде өткен ата-аналар жиыны «Бала тәрбиесіне байыппен қарайық» деген тақырыпта өтті. Жиынға округ әкімі Азамат Жақсиев, қамқоршылық кеңестің төрайымы Айман Ерғалиева, аудандық полиция бөлімінің кәмелетке толмағандар ісі жөніндегі учаскелік полиция инспекторы Әсем Қуанғалина және ата-аналар мен сынып жетекшілері қатысты.
Мектеп директоры Венера Мырзағалиева жиынды ашқаннан кейін округ әкімі Азамат Жақсиев алдағы уақытта балалар қауіпсіздігі мақсатында жарық жүргізу, жол салу сынды ауылда жасалтын жұмыстар жайлы айтып өтті. Бұдан соң сөз алған Табылды Нұртазин:
– Қазір күн қысқарып келеді. Балаларымыз сабаққа қараңғыда барып, қас қарая шығады. Ауыл көшелерінде жарық жоқ. Одан қалды ауылда бұралқы иттер көп. Қараңғы көшенің қай бұрышынан шығып, баламызды қабады екен деп қорқып отырамыз. Сондықтан мен немерелерімді сабаққа өзім алып келіп, алып кетемін. Округ әкімі осы базынамызды назарға алып, ауылдың шеткі көшелеріне жарық жүргізіп берсе деген ұсыныс бар, - деді. Бұған жауап берген округ әкімі бұл ұсыныс алдағы жұмыс барысында ескерілетіндігін тілге тиек етті. Сондай-ақ, жиын барысында оқушыларды электронды темекі тарту, ақша бопсалау, мектепке ұялы телефон әкелу, сабақтан қалу сынды жат қылықтан сақтандыру мәселесі де сөз болды.
Дулат ҒҰБАЙДУЛЛИН
