Өткен аптада облыстық «Зағиптар арманы» қоғамдық қорының ұйымдастыруымен «Арман» мәдениет үйінде мүмкіндігі шектеулі жандардың қатысуымен жиын өтті.
Оған аудан әкімінің орынбасары Марат Әбуов, облыстық «Зағиптар арманы» қоғамдық қорының ұйымдастырушысы Амантай Досаманов қатысты. Алдымен сөз алған аталған қор ұйымдастырушысы Амантай Досаманов:
– Облыстық зағиптар қоғамдық бірлестігінің алға қойған мақсаттары, бағдарламалық жобалары бар. Ашылғанына бір ай болса да біраз жұмыстарды бастадық. Өзіміз секілді жандардың басын қосып, өмірге деген құлшынысын ояту, қоғамға пайдасы тиетін іспен айналысу басты мақсат. Қазіргі таңда облысқа қарасты әр ауданнан қоғамдық бірлестіктің төрағасын тағайындап, жұмысты одан әрі жандандыруды ойлап отырмыз. Жиынның бүгінгі күн тәртібінде ауданнан төраға тағайындаймыз, - деді.
Жиын барысында қоғамдық бірлестік мүшелерінің ұйғарымымен аудандық қор төрағалығына Райымбек Якупов тағайындалды.
Өз тілшіміз
