Апта басынан бері елімізде көп талқыланған тақырыптың бірі – Мемлекет басшысы Қасым-Жомарт Тоқаевтың «Turkistan» газетіне берген сұхбаты. Президент бұл сұхбатта еліміздің ішкі және сыртқы саясатына дейін қамтып, біраз өзекті мәселені тілге тиек етті.
Соның ішінде көңіліме ұнағаны еліміздегі көлік-логистикасының дамуы жайлы айтқаны болды. Оның айтуынша, еліміз үшін көлік-логистика саласының әлеуетін арттыру – стратегиялық маңызы бар міндет. Теңізге тікелей шығатын жолы болмаса да, Қазақстан Еуразия құрлығының кіндік тұсында, яғни негізгі транзиттік күре жолдар тоғысқан жерде орналасқан. Жалпы, 2030 жылға дейін 5 мың шақырым теміржолды салып, жаңғырту және 11 мың шақырым теміржолды жөндеу көзделіп отыр. Елорда мен батыс аймақтардың арасындағы қашықтықты 500-ден астам шақырымға қысқартатын «Орталық – Батыс» күре жолы құрылысының стратегиялық маңызы өте зор. Еліміздің аумағы арқылы өтетін 12 халықаралық көлік дәлізі, атап айтқанда, 5 темір жол, 7 автокөлік дәлізі бар. Қытай мен Еуропа арасында құрлықпен жеткізілетін жүктің шамамен 85 пайызы осы жолдармен тасымалданады. Бұл ретте біздің ауданда да аз жұмыстар жасалып жатқан жоқ. Басқасын айтпағанда «Миялы-Тайсойған» тасжолының құрылысы аяқталып, аудандағы барлық округ асфальт жолмен қамтылды. Бұдан басқа округтерде ауылішілік жолдары салынып, жаяу жүргіншілерге де жол салынуда. Бір сөзбен айтқанда, ауданда көлік-логистикасы айтарлықтай дамып келеді. Бұл да болса президент саясатының беріп жатқан жемісі. Ендеше, ауданда осы бағытта жүйелі түрде жұмыстар жасала беруіне тілектеспіз.
Қанатқали КӘРІМОВ,
Тайсойған бастауыш ардагерлер ұйымының төрағасы
