Мемлекет басшысы Қасым-Жомарт Тоқаев: «Ұлтымыз жаңа сапаға көшуі үшін біздің күнделікті өмірлік ұстанымдарымыз да өзгеруі керек.

Қазақ қоғамында жаңа қағидаттар және жаңа бағдарлар салтанат құруға тиіс. Ұлт ұстазы Ахмет Байтұрсынұлы:

«Білімді болуға оқу керек. Бай болуға кәсіп керек. Күшті болуға бірлік керек. Осы керектердің жолында жұмыс істеу керек» дейді. Бұл көзқарас бүгінгі күні өте маңызды.

Біріншіден, жиырма бірінші ғасырдың ұрпағы терең білімді болғаны жөн.

Екіншіден, жас буынды ерінбей еңбек етуге бейімдеу қажет.

Үшіншіден, кез-келген істі кәсіби дағды арқылы жүзеге асырған дұрыс.

Төртіншіден, темірдей тәртіп және жоғары жауапкершілік баршамыздың бойымызда болуы керек.

Бесіншіден, әділдіктен айнымаған жөн. Әділдік – қоғам дамуының маңызды шарты. Әділеттілік – әсіресе, ел-жұрттың тағдырын шешу үшін аса қажет қасиет.

Алтыншыдан, бізге керегі – адалдық, ұқыптылық, тиянақтылық. Бәріміз нағыз қазақты дәл осындай кейіпте көргіміз келеді. Біз сонда ғана бәсекеге қабілетті мемлекет, зияткер ұлт қалыптастыра аламыз.», - деп жеке-жеке жіктеп тоқталған болатын.

Иә, шын мәнінде біз жастар арқылы қоғамның бет бейнесін түзей аламыз. Жат қылықтар ысырапшылдық пен даңғазалық, жауапсыздық пен немқұрайлылық, бос сөзділік, мақтаншақтық қоғамның дамуын тежейді. Сол себепті де, жастардың еңбек етуі мен жаңашылдыққа ұмтылуы ұлттың болмысын айқындай түсетіні анық.

Нұрбол БИЖАНОВ,

Жастар ресурстық орталығының директоры