Ұлыбританияда коронавируспен ауырғандарды емдейтін жаңа дәрілік препарат қолданыла бастады. Антидене арқылы әзірленген бұл дәрі қатерлі дерттің қаупін азайтады.
Ғалымдардың айтуынша, «Сотровимаб» деп аталатын жаңа препарат Omicron секілді вирустың жаңа штамдарына да тиімді болмақ. Оны тамырға тамшылату арқылы құяды. Препарат вируспен байланысып, оның жасушаларымызға енуін тоқтатады.
Клиникалық сынақ кезінде бір реттік доза ересектердің ауруханаға жату көрсеткішін және өлім қаупін 79 пайызға төмендетті. Бұл – Ұлыбритания денсаулық сақтау мекемесі мақұлдаған екінші дәрілік препарат.
«Ронапрев» және «Сотровимаб» секілді антидене арқылы емдеу тәсілі вирусты жұқтыра сала қолданғанда тиімділігін көрсетіп отыр. Дәрі-дәрмектер мен денсаулық сақтау өнімдерін реттеу агенттігі (MHRA) аталған препараттарды науқастың белгілері пайда болғаннан кейін бес күн ішінде қолдануға кеңес береді.
«Сотровимаб» (Xevudy) препаратын әзірлеп шығарған GSK компаниясы қазіргі таңда жаңа зертханалық сынақ жүріп жатқанын хабарлады. Бұл сынақ бүкіл әлемге таралып жатқан Omicron нұсқасына қаншалықты қарсы тұра алатынын анықтамақ.
Нақты нәтижеге қол жеткізу үшін қосымша деректер қажет. Бірақ зерттеушілер бұл препарат вирустың әлі үлкен өзгерістерге немесе мутацияларға ұшырамаған протеинінің бір бөлігіне бағытталғанын айтады. Яғни Omicron-ға қарсы тұра алады.
Жалпы, коронавирусқа қарсы бірнеше емдеу тәсілі бар. Оларды үш санатқа бөліп қарастыруға болады.
Біріншісі, вирусқа тікелей шабуыл жасайтын антиденелер. Яғни оны аурудан жазылғандардың қан плазмасынан немесе зертханада әзірлейді. Кейінгісіне «Ронапрев» және «Сотровимаб» секілді препараттар кіреді.
Екіншісі, «Молнупиравир» секілді вирусқа қарсы препараттар. Олар коронавирустың денеде таралуын тежейді.
Үшіншісі, иммундық жүйені тыныштандыратын «Дексаметазон» сияқты препараттар.
Egemen.kz
