Атыраулық белсенді жастар әлеуметтік проблемалар жайында талқылады, деп хабарлайды AtyrauPress тілшісі.
Атыраулық Avocado Production шығармашылық тобы белсенді жастармен кездесіп, әлеуметтік мәселелер жайын талқылады. Жиында сөз сөйлеген шығармашылық топ басшысы Дәурен Сейтқалиев осы уақытқа дейін түсірілген әлеуметтік бейнероликтерді көрсетіп, олар туралы толығырақ айта кетті. Avocado Production ұжымы бұған дейін мектептегі буллинг, лудомания, есірткіге және әлеуметтік желілерге тәуелділік секілді тақырыптарды қозғап, бейнероликтер әзірлеген болатын. Студенттер сценарийден бастап, актерлерді іріктеу, түсірілім мен бейнемонтажға дейінгі барлық процесті кәсіби деңгейде атқарған мамандардың жұмысымен танысты. Олар қоғамға аталған проблемалармен жалғыз күреспей, көмекке жүгіну қажеттігін жеткізуді мақсат еткен видеолардың идеясын қолдап, өз пікірлерін білдірді. Жиын соңында белсенді жастар алдағы әлеуметтік бейнероликтерде көргісі келетін тақырыптар бойынша ойларын айтып, ерте жүктілік, суицид секілді проблемаларды да көтеру қажеттігін алға тартты.
Айта кетейік, Avocado social video’s жобасын «Жастар таңдауы – Атырау» қоғамдық бірлестігінің ұйымдастыруымен «Азаматтық бастамаларды қолдау орталығы» жүзеге асырған. Бұл жоба қоғамдағы маңызды әлеуметтік мәселелерді түсінуге және оларды шешуге жастарды белсенді түрде араласуға шақырады. Ұжым осы мақсатта тапсырыс берушімен бекіткен түрлі тақырыпта әлеуметтік видеолар түсіріп келеді.
