Таяуда Нұрмұхан Жантөрин атындағы Атырау облыстық филармониясында Қазақстан Жазушылар Одағы Атырау филиалының ұйымдастыруымен Атырау облысы жас қаламгерлерінің туындыларынан құрастырылған «Армантауға асыққандар» атты жинақтың жарық көруіне орай, жас ақындар кеші өтті.
Жинақты құрастырған филология ғылымдарының кандидаты, ақын Гүлзада Ниетқалиева. Жауапты шығарушы «Ағатай» баспасы. Жалпы, «Армантау» жас ақындар клубы Атырау қаласында көп жылдардан бері жұмыс жасап келеді. Жинаққа 18 бен 40 жас аралығындағы жас ақын-жазушылардың өлеңдері мен әңгімелері енгізілген. Олардың арасында жерлес ақын-жазушылар Нұрислам Құспанғали, Меруерт Қабылова, Арман Жайық, Әнуарбек Садықов, Асылан Мәтенов, Бауыржан Сисенов, Арай Сисенбай, Таңшолпан Атшығалиева, Жақсылық Нұржол, Данагүл Егінбай, Мадияр Бекентайұлы, Сексенбай Өрбісінов, Дулат Ғұбайдуллин, Ақтілек Қәдірғали, Гүлхан Қалыбек, Әсем Қасым, Гүльфина Қойшығалиева, Нұржамал Өтеғұловалардың шығармалары бар.
Кітаптың алғысөзінде Атырау облысының әкімі Серік Шәпкенов: «...Ақындар – өз заманының айнасы, өз дәуірінің жылнама-шежіресі. Дөңгеленген әлем, мәртебелі Уақыт ұршықтай үйірілген сайын тарих сахнасына жаңа тұлғалар шығуы заңдылық.
Мынау жас ақындар жинағы осыны аңғартқандай, елдік жолындағы жасампаз дауысқа жамыраса үн қосқандай», - деп сенім білдірген.
Шара барысында, жас ақын-жазушыларға Х.Досмұхамедов атындағы Атырау мемлекеттік университетінің профессоры, филология ғылымдарының докторы Қадыр Жүсіп бата берсе, Қазақстан Жазушылар Одағы Атырау филиалының төрағасы Қойшығұл Жылқышиев: «Соңғы жылдардағы шығармашылық жастарды қолдау бағытында көптеген игі істер жүзеге асты. Алайда, дәл осындай кең ауқымдағы ұжымдық жинақ бұрын шықпады. Сондай-ақ осы жобаға қолдау көрсеткен облыс әкімі Серік Шәпкенов пен Атырау қаласының әкімі Мейірім Қалауиге және бүгінгі шараға жастарды қолдап келген ҚР Жазушылар Одағы мүшелеріне алғыс білдіремін», - деді. Сөйтіп, жас ақын-жазушылардың жинағы оқырманға жол тартты. Ендеше, өрісті өнегеге толы өлеңдері мен мазмұнды әңгімелері жүрекке жылылық ұялататын жерлес ақын-жазушыларға жазарларыңыз көбейе берсін деген тілек білдіреміз.
Нұрсәуле ЖАУЫНБАЕВА
