"Арман" мәдениет үйінің фойесінде аудандық орталық кітапханасының ұйымдастыруымен халықтың кітап оқу белсенділігін арттыру, кітап пен оқуға деген қызығушылығын қолдау мақсатында 23 cәуір - Дүниежүзілік кітап және авторлық құқық «KITAП шоу - 2023» фестивалі өтті.
Шараны аудандық мәдениет, тілдерді дамыту, дене шынықтыру және спорт бөлімінің басшысы Болат Салықовқа ашып, фестивалдің мәні мен маңызына тоқталып, кеш қонақтарына ризашылық білдірді. Фойе кітапхана суретшісі А.Биғалиеваның көркемдеуімен тақырыпқа сай безендіріліп, "Арман" мәдениет үйі өнерпаздарының музыкалық сүйемелдеуімен, Миялы балалар өнер мектебі оқушылары ансамблімен бірнеше күмбірлі күй орындалып, аталған өнер мектебі бишілері «Кел досым, кітапханаға» әніне «Бәрі кітаптан басталады» флешмобын әдемі бимен өрнектеді. Аниматорлар киіміндегі кітапхана қызметкерлері Р.Шауткенова, К.Жұмабаева жас өркендерге қуаныш сыйлап, Г.Спанова, Б.Жақсығали, Н.Жиеналиналар қатысушыларды «Көңілді кейіпкерлермен» (аниматорлар), «Ертегі әлемінде», «Фотозона» алаңдарында бүгінгі күннен естелік ретінде естелік видеоға, суретке түсірді. Алдымен «2023 жыл – Түркі өркениетінің даму жылы» деп жариялануына орай кітапхана қорында бар Х.Досмұхамедұлының туғанына 140 жыл толуына орай, «Бір ел – бір кітап», «Бір өлке – бір жазушы», «Оқу марафоны» акцияларына таңдалған кітаптардан кітапханашылар К.Сатаева, А.Ардаққызы «Ғажайып кітап әлемі» тақырыбында кітап көрмесіне библиографиялық шолу жасады. «Газет – өмір айнасы» тақырыбымен аудандық «Қызылқоға» газетінің 70 жылдығына арналған кітап инсталляциясы жасақталды. Әр жылдары жарық көрген газет беттеріне жарияланған мақалалар оқырманын қызықтыратыны сөзсіз.Сондай-ақ «Сәті түскен сұхбат» айдарымен кітапханашы Б.Серікбаева аудандық газеттің редакторы, Ақтан жыраудың шығармашылығын зерттеуші, Халықаралық «Шабыт» шығармашыл жастар фестивалінің лауреаты, жас ғалым, Қызылқоға ауданының тарихи тұлғалары туралы бірнеше еңбектердің авторы Бауыржан Сисеновпен және баспасөз саласының ардагері, журналист, Қазақстанның құрметті журналисі атағының иегері, бірнеше шығармалардың авторы Жолдас Жанқуатовпен шағын сұхбат жүргізді. Кеш қонақтары құрметіне әнші Мейрамгүл Болатқызының орындауында "Жақсы адамдарым" әні жолданды. Кітап керуені одан әрі Исатай Тайманұлы бастаған көтерілістің көсемі, әрі жалынды жыршысы, халқының азаттығын көксеген күрескер, ел бастаған батыр, қазақтың өр рухты ақыны Махамбет Өтемісұлының туғанына 220 жыл, ақын, өлкеміздің тумасы Мұрат Мөңкеұлының туғанына 180 жыл және ақын Мағжан Жұмабаевтың туғанына 130 жыл толуына орай «ПоэзияPartyмен» жалғасты. Одан әрі көрермендер арасынан «Мен оқыған кітап» букдатингі өткізілді.Фесиваліміз одан әрі аудандық балалар кітапханасы оқырмандарымен «Кел, балалар, оқылық!» балаларға арналған кітап көрмесін кітапханашылар Р.Оңайбайқызы, Г.Лұқпанова таныстырып, «Кім тапқыр?» тақырыбында мақал-мәтел, жұмбақ жарысы жүргізілді. Жас оқырмандарымыз дайындаған «Шық бермес Шығайбай» қойылымы көпшілік назарына ұсынылды. Сондай-ақ «Жарқын болашақ – жастар көзімен» атты жастармен пікіралысу жүргізілді. Кітапханашы Г.Үмбетбаева ауыл жастары Р.Амантай мен А.Ардаққызынан шағын сұхбат алды. Шараның жүру барысына Ы.Шөреков атындағы мектеп-гимназия мұғалімі Г.Оразова ризашылығын білдіріп, балаларды кітап оқуға шақырды. Шараны кітапхана директоры Т.Базарбаев қорытындылап, қатысушыларды алғыс хаттар мен естелік сыйлықтармен марапаттады.
