Жақында аудандық әдістемелік орталықтың ұйымдастыруымен Сағыз орта мектебінде дәстүрлі Мұқағали оқулары өтті.
Байқау үш кезеңді қамтып, оған ауданға қарасты орта білім беретін мектептің 7-11 сынып оқушылары қатысты.
«Айтып өткен ақында арман бар ма?» кезеңінде үміткерлер ақынның шығармашылығынан жатқа білетін өлеңдерінің тізімін қазылар алқасына ұсынып, олардың нұсқауымен кез келген өлеңді жатқа оқыды. Ал, екінші кезең «Жыр эстафетасына» қатысушылар «Аққулар ұйықтағанда», «Алтай-Атырау» және «Райымбек-Райымбек» поэмаларын жатқа білуі керек болса, «Көкірегімде жыр сәулесі маздайды..» бөлімінде өз шығармашылығы жинақталған кітапшасынан бір өлеңді жатқа оқиды.
Нәтижесінде, «Айтып өткен ақында арман бар ма?» кезеңі бойынша Қарабау орта мектебінің 9-сынып оқушысы Құралай Қонысбаева, «Жыр эстафетасы» кезеңінде Қаракөл орта мектебінің 9-сынып оқушысы Айжұлдыз Бағыт, «Көкірегімде жыр сәулесі маздайды..» кезеңінде Кенбай орта мектебінің 11-сынып оқушысы Ақбота Жәрдем І орынға ие болып, облысқа жолдама алды.
– Байқауда үш кезең бойынша 31 оқушы бақ сынады. Бірінші кезеңге он үш, екінші кезеңге сегіз, үшінші кезеңге он оқушы қатысты. Сайыскерлер бірінен-бірі өтеді . Осы орайда, жыр додасына оқушы дайындап алып келген жетекшілерге алғыс білдіреміз,– дейді аудандық әдістемелік орталықтың қоғамдық-гуманитарлық пәндер әдіскері Алмагүл Қапезова.
Гүлмира МАҚСОТҚЫЗЫ
