Үй жағдайында ем алып жатқан науқастарды 129 мобильді топ бақылауда, деп хабарлайды Атырау облысының өңірлік коммуникациялар қызметі.

Бұл туралы өңірлік коммуникациялар қызметінің брифингінде денсаулық сақтау басқармасы басшысының орынбасары Қайсар Әбдалиев атап өтті.

– Бүгінгі таңда COVID-19 диагнозы қойылған 3 948 адам - амбулаторлық бақылауда. Атап өтер жағдай, олардың саны соңғы бір аптада 3 есеге артқан. Науқастарды 129 мобильді топ бақылауда, - деді спикер.

Айта кетерлігі, Атырау қаласында 54 бригада, өңірлерде 75 мобильді топ жұмыс істейді. Бұл ретте резервтегі жылжымалы бригадалардың саны – 50. Аурулардың көбеюіне байланысты емханалар тарапынан амбулаторлық науқастарды қадағалау күшейтілді.