Жақында аудандық балалар кітапханасында 1-3 сынып оқушылары арасында  «Бағдаршамның мектебі» айдарымен  сұрақ-жауап сағаты өткізілді. Шараны аудандық балалар кітапханасының меңгерушісі Роза Әбілханова ашса, кітапханашы Гүлдана Лұқпанова жол қауіпсіздігі, жолда жүру ережелерін оқушыларға кеңінен үйретті. Сондай-ақ, оқырман балаларға Қ.Шағырдың «Жол ережесі», Б.Мырзабековтің «Айналайын, абайла!», Д.Родаридің «Көгілдір бағдаршам» кітаптарынан түрлі-түсті суреттер, жол қауіпсіздігі туралы өлеңдер оқылып, сұрақтарға жауап берілді.

Сонымен қатар, аталмыш кітапханада мекеме аралық жоспарға сәйкес аудан орталығындағы балабақшалардың ересектер тобына «Шуақ» айдарымен  балабақшаға арнайы барып,  халқымыздың қызықты ертегілері, мақал-мәтелдері, жұмбақтары дауыстап оқу өткізілді. Ондағы мақсат – кітапхананың кішкентай оқырманының санасына кітап деген әлемнің бар екендігін ұялату, рухани байлыққа қызығушылықтарын ояту болып табылады.

Үздіксіз аудандық балалар кітапханасымен байланыс жасап келе жатқан 3-4 сынып оқушыларына ғаламтордың пайдасы мен зиянын түсіндіру мақсатында «Ғаламтор ғажаптары» тақырыбымен  сұрақ-жауап сағаты өтті. Онда балаларға арналған мерзімді басылым мақалалары оқылды. Атап айтсақ, «Бала би» журналындағы «Ғаламтор: пайдасы мен зияны», «Ақ Желкен» журналына жарияланған «Компьютер синдромы», «Балаңыз  YouTube-ден не көріп жүр?», «Смартфон қауашағында не бар?». сонымен қатар, оқушылардан телефонға қаншалықты үйір екендігі сұралып, жиі үңілу зиян екендігі айтылды.

Нұрсәуле ЖАУЫНБАЕВА