Жұмыссыздар санын азайту мақсатында, ауданда ауқымды іс-шаралар жүзеге асуда. Соның бір айғағы бүгін Сағыз ауылында "Шұғыла" мәдениет үйінде бос жұмыс орындарының жәрмеңкесі өтті.
Аудандық Жұмыспен қамту орталығы ұйымдастырған жәрмеңкеге барлығы 68 адам қатынасты. Жер қойнауын пайдаланушы мердігер мекемелер мен Теңіз қалашығындағы мұнай компанияларынан, Сағыз ауылдық округіне қарасты шаруа қожалықтарынан 79 бос жұмыс орындары ұсынылды. «Сағыз Петролеум Компани» жауапкершілігі шектеулі серіктестігінің орталық инженерлік-техникалық қызмет бастығы Қуаныш Сейтмағанбетов, «Denholm Zholdas» жауапкершілігі шектеулі серіктестігі кадр бөлімінің үйлестірушісі Гүлмира Мажитова, кадр бөлімінің маманы Альфия Ермекова және «Тат-арка» жауапкершілігі шектеулі серіктестігінің әкімшілік көмекшісі Фарида Насановалар арнайы келіп қатынасып, жұмыссыздарға бос жұмыс орындарын ұсынды. Сөйтіп, жұмыс іздеушілердің түйіндемелері жинақталып, мамандықтары бойынша тиісті мекемелерге жіберілді.
Кәмшат ӘБІШ
