Жаңа жыл басталғанда әр ұжым өткен жылғы жұмысын қорытындылап, баға беріп жатады. Бұл ретте, жетпіс жылдан астам тарихы бар аудандық «Қызылқоға» газеті үшін де өткен 2024 жыл табыссыз болмады. Әрине, газеттің ең басты байлығы оқырман екені белгілі. Соған сай, өткен жылдың қазан айында «Баспасөз-2025» науқаны басталып, оқырман санын арттыру мақсатында редакция тарапынан жүйелі жұмыстар қолға алынған болатын. Нәтижесінде аудандық «Қызылқоға» газетіне 2476 оқырман жазылып, «Атырау-Ақпарат» жауапкершілігі шектеулі серіктестігіне қарасты жеті аудандық газет ішінде үздік үштіктің қатарынан көрінді.
Әрине, бұл жаман көрсеткіш емес. Дегенмен, межелеген жоспарға жете алмағанымыз рас. Ал, 2024 жылдың ІІ жартыжылдығымен салыстырар болсақ бұл жолы 658 оқырман артық екендігін көруге болады. Газет оқырмандарының басым бөлігі ауданға қарасты ауылдық округтердің халқы екендігі белгілі. Науқан барысында редакция қызметкерлері өздеріне белгіленген ауылдарды аралап, газеттің аудан халқы үшін маңыздылығын түсіндіріп, жазылу жұмыстарын да ұйымдастырды.
Бұған қоса облыс, аудан басшылары да облыстық, аудандық газеттердің жазылуына ұйымдастыру жұмыстарын жүргізуге ықпал етті. Бұл ретте, аудан әкімінің орынбасары Гүлшара Ізімова мен аудандық ішкі саясат бөлімінің басшысы Асқар Ақтаев бастаған ұжым белсенділік танытты. Нәтижесінде Ойыл, Жангелдин ауылдық округтері өздеріне бөлінген жоспарды артығымен орындап, өзгелерден оқ бойы озық шықты. Бұл орайда, Ойыл ауылдық округінің әкімі Мағжан Жексенов, «Қазпошта» бөлімшесінің операторы Бекбол Жанқуатов және Жангелдин ауылдық округінің әкімі Ғайса Қанаттың еңбектері зор. Ауылдық округтер арасында тайсойғандықтарды үшінші орынға қоюға болады. Бұл округ өздеріне берілген 150 газеттің 135-ін жаздырып, жоспарды 90 пайызға орындап отыр. Бұл орайда, баспасөз науқанында нәтижелі жұмыс жасаған округ әкімі Төреш Қозбақовқа да айтар алғыс зор. Берілген жоспарды пайыз көрсеткішіне шағар болсақ Тасшағыл (79 пайыз), Жамбыл (73 пайыз), Көздіғара (71 пайыз), Қызылқоға (67 пайыз), Миялы (60 пайыз), Сағыз (52 пайыз), Мұқыр (30 пайыз) ауылдық округтерін ретімен орналастыруға болады.
Оқырман санын арттыру мақсатында «Аудандық газет – әр үйге қажет» деп баспасөзге жазылу науқанына атсалысқан редакция қызметкерлерінің де еселі еңбегін айта кеткен жөн. Атап айтқанда, тілші Гүлмира Тілегенова өзіне берілген округтердің 100 пайыз жазылуына үлес қосса, веб-редактор Кәмшат Әбіш оқырмандардың «Қазпошта» мекемесіне бармай-ақ үйінде отырып газетке жазылуына өз септігін тигізді. Жыл соңында аталмыш қос қызметкер «Атырау-Ақпарат» жауапкершілігі шектеулі серіктестігінің бас директоры Нұрболат Елеусіновтың Алғыс хатымен марапатталды.
Сол сияқты газетке жазылу кезінде «Аудандағы жалғыз газетті қолдау – азаматтық парызым» деп демеушілік танытқан атымтай жомарттар да болды. Осылайша интернет дәуіріне қарамастан аудандық «Қызылқоға» газеті өзінің тұрақты оқырманын қалыптастырып, жаңа жылдың алғашқы санын да халыққа жолдап отыр. Бұл ретте, газетіміз алдағы уақытта да оқырман көңілінен шығатын мазмұнды материалдарды жариялап, оқырманмен тығыз байланыста жұмыс жасай береді. Айтпақшы, осы жолы газетке жазылып үлгемерген жандар үшін әлі де мүмкіндік бар. Яғни, «Қазпоштаға» әр айдың 25-не дейін барып жазылсаңыз келесі айдың 1-де газетіміз төріңізде тұрады. Осылайша, газетке жазылу жыл бойы жалғаса береді. Ендеше, бізбен бірге болыңыз, қадірлі оқырман!
ҚҰРМЕТПЕН,
РЕДАКЦИЯ ҰЖЫМЫ
Біздің демеушілер:
Құлмағамбет Қоданов
Оңғар Жанықұлов
Мұрат Сарманов
Қайырбек Баймұратов
Октябрь Нұрадинов
Алшын Омаров
Медет Көбенов
Шалқар Қасымов
Зайнаб Бажирова
Ұлжан Жазит
Нұрлыбек Әміршин
Әлия Мекебаева
Қайырғали Есболаев
Алпысбай Нұров
Нұртас Ізғұлов
Құрманбек Жаңабаев
Ертай Әжіғалиев
Темір Жаңабаев
Асхат Үбіғалиев
Ыбырай Уахитов
«Қазыбек би» қоры
Нәдір Қарабалин
Гаухар Досқалиева
Рауан Сабыров
Асылбек Мұратов
Орынғали Сүндетов
Алмас Ғизатов
Жанар Есенжанова
Абдол-Хасан Әлімұлы
Шолпан Мұқашова
«БатысҚазақҚұрылыс» ЖШС
