Республикалық «Қауіпсіз жол» жедел-профилактикалық іс-шарасы барысында құрамында аудандық полиция бөлімінің қызметкерлері, аудандық қоғамдық кеңес мүшелері, «Атырау – адалдық алаңы» жобалық кеңсесінің аудандағы өкілі бар арнайы топ рейдке шықты.
Жол қауіпсіздігін сақтау, жол-көлік апаттарының алдын алу және заңсыз таксилерді анықтау мақсатында ұйымдастырылған рейд кезінде «Миялы-Атырау» бағытына жүретін таксилер тоқтатылып, құжаттары тексерілді. Нәтижесінде тоқтатылған 7 көліктің үшеуінің жүргізушісіне әкімшілік хаттама толтырылып, айыппұл салынды.
Жергілікті полиция қызметі бөлімшесінің бастығы Асқат Құлбаевтың айтуынша былтырғы жылы аудан бойынша 14 адам, биылғы жылдың 4 айында 2 адам жол-көлік апатынан қайтыс болған. Еліміз бойынша 17 мамыр-16 маусым аралығында өтіп жатқан «Қауіпсіз жол» жедел-профилактикалық іс-шарасы осындай апаттардың алдын алу мақсатында ұйымдастырылып отыр. Рейдтік іс-шаралар 16 маусымға дейін жалғасатын болады.
Дулат МӘТЖАН
