Мемлекет басшысы Қасым-Жомарт Тоқаевтың бастамасымен 8 сәуірде еліміз бойынша «Таза Қазақстан» республикалық экологиялық акциясы басталған болатын. Ауқымды экологиялық науқан «Таза өлке», «Киелі мекен», «Жасыл аймақ», «Өнегелі ұрпақ», «Мөлдір бұлақ» тақырыптарымен жүзеге асты. Акция аясында ауыл көшелері, өзен жағалаулары тазартылып, елді-мекендерді көгалдандыру, ағаш отырғызу жұмыстары жүргізілді. Осы ретте, «Арман» мәдениет үйінде «Таза Қазақстан» республикалық экологиялық тазалық акциясы аясында аудан әкімінің қолдауымен аудандық ішкі саясат бөлімі және «Миялы» мүгедектер қоғамдық бірлестігінің ұйымдастыруымен «Таза ауыл – өзіңнен басталады» тақырыбында көктемгі және күзгі тазалық айлығын қорытындылау шарасы болып өтті.
Аудан тұрғындары арасында экологиялық тұрғыдан үгіт-насихат жұмыстарын жүргізу, тұрғындардың экологиялық сауатын арттыру және өңірдің экологиялық жағдайын жақсарту мақсатында өткен шарада сөз сөйлеген аудан әкімі аппаратының басшысы Асылбек Жанқуатов:– Мемлекет басшысының тапсырмасымен бастау алған «Таза Қазақстан» республикалық экологиялық акциясы аясында ауданымыздағы елді мекендерді көгалдандыру және санитарлық тазалаудың көктемгі және күзгі айлықтарын ұйымдастырудың нақты іс-шаралар жоспары бекітіліп, ұйымшылдықпен өткізілді. Оған аудандағы барлық мекеме, тұрғындар ұйымшылдықпен қатысып, елді мекендердің келбетін көтеруде көптеген жұмыс атқарды. Сол үшін баршаңызға алғыс айтамын, - деген тілегін білдіріп, «Таза Қазақстан» республикалық экологиялық акциясы аясында тазалық жұмыстарындағы белсендігі үшін бір топ азаматқа аудан әкімінің Алғыс хаты мен қаржылай сыйлық табыс етті.
Бұдан кейін шараға қатысушыларды құттықтаған аудандық мәслихат төрағасы Толқын Бейсқали ауылдық округ әкімдеріне «Үлгілі көше» номинациясын табыс етті. Сондай-ақ, мерекелік шарада аудандық ардагерлер кеңесінің төрағасы Сағидолла Яқып пен «Миялы» мүгедектер қоғамдық бірлестігінің төрағасы Асылбек Мұратов №12 өрт сөндіру бөлімі (Сағыз а/о), Мұқыр орта мектебі (Мұқыр а/о), Ғ.Сланов атындағы орта мектеп (Тайсойған а/о), «Шалқыма» мәдениет үйі (Ойыл а/о), Қоныстану балалар өнер мектебі (Көздіғара а/о), «Нұр-Шуақ» (Миялы а/о), «Балбөбек» (Жангелдин а/о), "Жазира" (Тасшағыл а/о), "Жауақазын" (Жамбыл а/о), "Қарлығаш" (Қызылқоға а/о) балабақшалары «Үлгілі мекеме» номинациясымен, ал Талғат Орақов (Миялы а/о), Айдос Досекенов (Сағыз а/о), Ермек Ермұханов (Мұқыр а/о), Мансұр Жаңабаев (Жангелдин а/о), Асхат Есендияров (Ойыл а/о), Қуандық Омаров (Көздіғара а/о), Шаттық Базарбаев (Тасшағыл а/о), Бақтыбай Оразов (Жамбыл а/о), Бауыржан Ерғалиев (Қызылқоға а/о), Әди Нұрниязовтардың үйі (Тайсойған а/о) «Үлгілі үй» номинациясымен және қаржылай сыйлықпен марапатталды.Шара барысында «Арман» мәдениет үйінің өнерпаздары әннен шашу шашып, мың бұрала биледі. Осылайша, ауданның тазалығын сақтап, көркейтуде тынымсыз еңбек еткен жандарға құрмет көрсетіліп, олардың адал еңбектері лайықты ұлықталды.
Бауыржан САҚТАСЫНОВ
