БИІКТЕСІН, ТӘУЕЛСІЗ ЕЛДІҢ ТҰҒЫРЫ!

Информация о материале: Аудан тынысы; : 27 Желтоқсан 2021; : 957

«Арман» мәдениет үйінде Қазақстан Республикасы Тәуелсіздігінің 30 жылдығына арналған салтанатты жиналыс өтті.

Ауыл тұрғындары, мекеме қызметкерлерімен басшылары қатысқан жиында алдымен ел тарихынан сыр шертетін видеоролик көрсетілді. Одан соң сахна төріне көтерілген аудан әкімі Нұрсұлтан Бисембиев:

- Бүгін міне рухы биік, тұғыры берік Тәуелсіз елімізге – 30 жыл толды. Сан ғасырлар бойы азаттық деп алысқан,егемендік деп еңіреген ата-баба арманын орындау бақыты бүгінгі ұрпақ біздің еншімізге тиіп отыр. Амандық-саулық адамның нағыз бақыты болса, Тәуелсіздік халықтың жалғыз бақыты. Тәуелсіз Қазақстан небәрі 30 жыл ішінде төрткүл дүние мойындаған, экономикалық-саяси, әлеуметтік-мәдени және рухани салаларда қарыштап дамып, әлемдік көштерден ойып орын алған ілгері елге айналды. Бұл бабалар рухынан қуат алған азат елдің бүгінгі азаматтардың еңбегі мен ерік жігері. Қазақстан Республикасының Тұңғыш Президенті Н.Ә.Назарбаевтың көреген саясаты, кемеңгер стратегиясымен қажырлы қызметінің арқасы.

Тәуелсіздіктің арқасында ауданымызда айтарлықтай жетістіктерге қол жеткізді. Халықтың тұрмыс сапасынжақсарту – ең басты міндетіміз болды. Егеменді ел болғалы халықты ауызсу, газ, электр желілерімен қамтуға қатысты ауқымды жобалар жүзеге асты. Аудан аумағында 724 шақырым газ желісі тартылып, табиғи газбен қамтылды. 466 шақырым ауыз су желісі тартылып, халық ауызсумен, тұрғын үй кезегінде тұрған 300-ге жуық тұрғын баспанамен қамтылды. Автокөлік жолдары салынып, жөндеуден өтті. 7 орта мектеп пен 5 мектепке дейінгі шағын мектептер салынды. Сондай-ақ, 1 аурухана, 5дәрігерлік амбулатория, 5 фельдшерлік пункт салынып, 2 спорт кешені мен 3 мектептің спорт залы ашылды. Бүгінгі Тәуелсіздігіміздің 30 жылдығын тойлап отырған еліміздің ең биік мұраты – келешегі кемел, мақсаты айқын, бірлігі бекем, тірегі мығым ел болу. Көк байрағы желбіреген,ынтымағы мен бірлігі жарасқан еліміздің егемендігі баянды болғай, - деді.

Сондай-ақ, аудан әкімі өңірдің әлеуметтік және экономикалық дамуына өз үлесін қосып, ел игілігіне еңбек етіп жүрген 23 азаматқа «Қазақстан Тәуелсіздігіне 30 жыл» мерекелік медалын табыс етсе, белсенді депутаттық қызметі және өңірдің әлеуметтік-экономикалық дамуына қосқан үлесі үшін Қазақстан Республикасы Парламенті Сенатының Құрмет Грамотасымен аудандық мәслихат хатшысы Альберт Аққайнанов пен Аманбай Өміров атындағы өнер мектебінің директоры Сәндігүл Дауленова марапатталды. Ал, денсаулық, білім салаларының ардагері Самат Тайшыбай мен Өтеуғали Дүйсәлі «Қызылқоға ауданының Құрметті азаматы» атағына ие болды. Бұған қоса, бір топ еңбек майталмандары Қазақстан Республикасы ауыл шаруашылығы министрлігі мен Қазақстан Фермерлері қауымдастығының «Еңбек ардагері» медалі, Құрмет Грамоталарымен мадақталды. ⠀