Бүгін Миялы спорт кешенінде белгілі кәсіпкер, спорт жанашыры Серік Сабытаевты еске алуға арналған волейболдан аймақтық ашық турнир өтті.
Жарысқа Ақтөбе облысының Ойыл, Атырау облысының Құрманғазы, Жылыой, Исатай, Махамбет, Мақат, Индер, Қызылқоға аудандарының құрамалары және «Серік» командасы қатысты. Турнирдің ашылу салтантында аудан әкімі Нұрсұлтан Бисембиев, Қазақстан Республикасы еңбек сіңірген жаттықтырушысы Мәлік Сүлейменов және Сабытаевтар әулетінен Гүлмира Жеңісова сөз алып, жарысқа қатысушыларға сәттілік тіледі.
Содан кейін 9 команда үш топқа бөлініп, топтық ойындарды бастап кетті. Топтық ойыннан үздік шыққан 6 команда жартылай финалға жолдама алды. Жартылай финалдық ойындар да тартысты өтіп, үздік үш команда ақтық сынға өтті.
Жарыс нәтижесінде бірінші орынды жеңіп алған Ойыл ауданының құрамасы 250 мың теңге ақшалай сыйлықпен марапатталса, олардан ақтық сында ұтылған алаң иелері күміс жүлдемен қоса 150 мың теңге байраққа ие болды. Жүлделі үшінші орынды жеңіп алған құрманғазылықтарға 100 мың теңге ақшалай сыйақы табыс етілді. Ал, «Үздік шабуылшы» болып ойылдық Шыңғыс Қабдығалиев танылса, «Үздік қорғаушы» атағы жерлесіміз Тұрар Садауовқа берілді. «Үздік ойыншы» атағымен Әлімғазы Өтеушов марапатталды.
