Жаңа Қазақстан құру үшін жаңару қажет

Президент Парламент палаталарының төрағаларымен, Премьер-Министрмен кеңесіп, Мәжілісті тарату және мәслихаттардың өкілеттігін мерзімінен бұрын тоқтату туралы Жарлықтарға қол қойды. Бұл өте дұрыс әрі уақытылы шешім болды деп есептеймін. Мәжілістің кезектен тыс сайлауы биыл 19 наурызда өтеді. Барлық деңгейдегі мәслихаттардың сайлауын Орталық сайлау комиссиясы белгілейді. Мемлекет басшысы күздегі Жолдауында Мәжіліс пен мәслихаттар сайлауы осы жылдың бірінші жартысында болатынын жариялады. Яғни, бұл бастама айтылған сәттен сайлауға дейін жарты жылдан астам уақытты қамтиды. Тәуелсіздік жылдарында сайлауға дайындалу үшін кандидаттар мен саяси партияларға осыншама көп уақыт берілген емес. Енді Мәжіліс депутаттарының 70 пайызы партиялық тізім арқылы, ал қалған 30 пайызы бір мандатты округтерден сайланады. Облыстар мен республикалық маңызы бар қалалардағы мәслихат депутаттары да аралас жүйе бойынша сайланады. Депутаттардың 50 пайызы бір мандаттық жүйе арқылы, 50 пайызы партиялық тізім бойынша өтеді. Ал, аудан және облыстық маңызы бар қалалардағы мәслихат сайлауында азаматтар бір мандатты округтерден шыққан кандидаттарға дауыс береді. Осылайша, Мәжіліс пен мәслихаттар жаңа үлгі бойынша жасақталады. Ендеше, сайлаушылардың мүддесі жалпыұлттық және аймақтық деңгейде толық қорғалады деген сенім бар. Гүлзада ШАКУЛИКОВА, «Сафи Өтебаев атындағы Атырау мұнай және газ университеті» КеАҚ Басқарма төрағасы-ректор https://atpress.kz