Қазақстандағы Жұмысшы мамандықтар жылы аясында біз күн сайын еңбегімен айналаны жайлы әрі мейірімді ететін адамдар туралы әңгімелейміз. Сол жандардың бірі – Теңіз кен орнындағы асханада еңбек ететін аспаз Мөлдір Дүйсембекова. Жеті жылдан бері ол жүздеген қызметкерге сүйіспеншілікпен ас әзірлеп, әр тағамды қуат пен көтеріңкі көңілдің қайнар көзіне айналдырып келеді.
Мөлдір Атырау облысы Жылыой ауданы Құлсары қаласында дүниеге келген. Тамақ дайындауға қызығушылығы бала кезінен оянған. Ол бала күнінде үлкен отбасы үшін ас әзірлейтін анасын қызыға бақылап, оның қимылдарын қайталауға тырысқанын еске алады.
«Маған әрдайым дәм мен үйлесім жасау ұнайтын. Сол кезде-ақ ас үй – адамдарға қуаныш сыйлайтын орын екенін сездім», – дейді Мөлдір күлімдеп.
Колледжді тәмамдаған соң, Мөлдір алғашқы еңбек жолын бастаған. Біраз уақыттан кейін ол Теңіз жобасына аспаз болып орналасады. Алғашқы күндері оңай болмаған: адамдар көп, талап жоғары, жауапкершілік үлкен.
«Бірақ дәл сол сәтте мен түсіндім – аспаз болу жай мамандық емес, бұл – жүрекпен жасалатын іс», – дейді ол.
«Жақсы аспаз ұқыпты, сабырлы және ең бастысы – өз ісін сүйетін адам болуы керек. Себебі махаббатпен пісірілген ас әрқашан ерекше дәмді болады», – деп бөліседі Мөлдір.
Мөлдір әсіресе десерттер дайындауды жақсы көреді – торттар, суфле, пирожныйлар.
«Маған тәттілер пісіру ерекше ұнайды. Адам сенің тортыңнан дәм татып, күлімдеген сәт – нағыз бақыттың өзі», – дейді ол жылы жүзбен.
Теңіздегі жұмыс Мөлдірге тек кәсіби тәжірибе ғана емес, жеке өміріндегі маңызды кезеңге де айналды. Дәл осы жерде ол болашақ жұбайымен танысып, бүгінде бірге ұл тәрбиелеп отыр.
«Біз жұмыста таныстық, қазір отбасылы жандармыз. Айтуға болады, Теңіз біздің өміріміздің бір бөлігіне айналды», – дейді Мөлдір күліп.
Мөлдірдің пікірінше, аспаз мамандығы да кез келген басқа кәсіп сияқты құрметке лайық. Себебі олардың еңбегі жүздеген адамның көңіл-күйі мен денсаулығына әсер етеді, әсіресе үйінен жырақта жүргендер үшін.
«Адам асханадан тоқ әрі риза болып шықса – бұл мен үшін ең үлкен алғыс. Мен үшін маңыздысы – тамақ әзірлеу ғана емес, әр тағам арқылы жылулық сыйлау», – дейді ол.
Мөлдірдің әріптестері оның дайындаған тағамдарының ерекше дәмі мен шынайылығын атап өтеді. Теңіз қызметкерлері әзілдеп: «Бүгін Мөлдір кезекші болса – түскі ас міндетті түрде дәмді әрі сүйіспеншілікпен дайындалған болады», – дейді. Көпшілік оны асхананың шын мәніндегі аспаздық шебері деп санайды.
