Елордада 2021 жылы 2020 жылмен салыстырғанда онкологиялық аурулармен сырқаттанушылық деңгейі 9,8% арттық, немесе 100 адамға шаққанда 180,1 жетті. Сондай-ақ, өлім-жітім көрсеткіші де былтыр 2020 жылға қарағанда 1,8% өсті немесе 100 мың адамға шаққанда 71 құрады.
Орталық коммункиациялар қызметі алаңында өткен брифингте Нұр-Сұлтан қаласы әкімдігінің көпсалалы медицина орталығының директоры, Нұр-Сұлтан қаласының бас онкологы Мұхтар Төлеутаев осындай көрсеткіштерді келтіріп өтті.
«Бірінші орында сүт безі обыры, екінші – колоректалды, яғни тоқ ішек пен тік ішек қатерлі ісігі. Содан кейін, асқазан ісігі мен жатыр мойны ісігі. Ал өлім-жітім көрсеткіштері бойынша өкпе обыры бірінші, асқазан обыры екінші орында, одан кейін колоректалды, төртінші орында сүт безі обыры, бесінші орында ұйқы безі обыры. Қатерлі ісікті анықтау үшін аталған бағыттар бойынша кешенді жоспар іске асырылып жатыр. Олардың ішіне скрининг бағдарламалары да кіреді. Скринингтік тексерулер бастапқы медициналық ұйымдарда жүргізіледі», - деді спикер.
