Қ.Тоқаев Үкіметтің кеңейтілген отырысында өңірлік дағдарыс пен азаматтардың табысын арттыру жайында сөз қозғады.
"Халықаралық институттар әлемдік экономика қарқыны бәсеңдейді деген болжам айтуда. Соған сәйкес инфляция жаппай өсуі мүмкін. Өңірлік дағдарыстың ұзаққа созылып бара жатқанын байқап отырмыз. Тіпті, бұл ахуал жаһандық тоқырауға ұшыратады деген қауіп бар" деді Президент. Сондай-ақ ол осы тұста Үкімет пен Ұлттық банктің міндетін атап өтті. "Осындай жағдайда Үкіметтің және Ұлттық Банктің негізгі міндеті – инфляцияны тұрақтандырып, азаматтардың табысын арттыру болуға тиіс. Сондай-ақ, жаңа жұмыс орындарын ашу қажет" деді Мемлекет басшысы.
