Атырау облысында жыл басынан бері 4 923 адам тұрақты жұмысқа орналасты.
Облыстық жұмыспен қамтуды үйлестіру және әлеуметтік бағдарламалар басқармасының бөлім басшысы Гүлболат Аманғалиеваның мәліметінше, жыл басынан бері жұмыспен қамту орталығына 10 096 адам жүгінген.
«Басқармаға хабарласқан адамдардың арасынан жергілікті 4 923 тұрғын тұрақты жұмысқа орналастырылды. Жалпы жұмыспен қамту шараларымен 5 045 адам қамтылды. Оның ішінде 2 219 адам тұрақты жұмыс орындарына, 328 адам әлеуметтік жұмыс орындарына, 120 жас түлек жастар практикасына, 2 256 адам қоғамдық жұмыстарға, 22 адам алғашқы жұмыс орындарына орналасты. Бұған қоса, онлайн Skiils оқыту курсына 56 адам жіберілді. Ал, өз кәсібін ашу бағытында 44 адамға мемлекеттік грант берілді», -дейді басқарманың жұмыспен қамту бөлімінің басшысы Гүлболат Аманғалиева.
Оның айтуынша, биыл ұлттық жобалар шеңберінде азаматтарды жұмыспен қамтудың 10 қадамы алгоритмі жасақталған. Алгоритмге сәйкес іс-шаралар ақпараттық жүйе арқылы іске асырылады. Сондай-ақ, электрондық еңбек биржасында онлайн жәрмеңкелер ұйымдастыру көзделген.
«Биыл «2021-2025 жылдарға арналған кәсіпкерлікті дамыту жөніндегі» ұлттық жоба негізінде әлеуметтік қолдау шараларын іске асыру жоспары жасақталды. Соның аясында 21 751 адамды әр түрлі бағыттағы қолдау шараларымен қамту жоспарланып отыр», -дейді Гүлболат Аманғалиева.
