Күні кеше елімізде Парламент Мәжілісі мен мәслихат депутаттарын сайлауы өткен болатын. Өз-өзімді ұсыну бойынша №9 сайлау округі бойынша депутаттыққа үміткер ретінде тіркелдім.
Мұндағы мақсатым – ауданымыздың алға қарай дамуына өз үлесімді қосу. Яғни, сайлауалды бағдарламамда көрсеткендей Тайсойған ауылына жаңа үлгідегі балабақша салынуына, халықтың аз қамтылған тобына жан-жақты қолдаулардың көрсетілуіне, «Дипломмен ауылға» бағдарламасы бойынша ауылдық жерлерге жас мамандарды тарту жұмыстарын жетілдіруге, шағын бизнес өкілдері мен өзін-өзі жұмыспен қамтушы азаматтарға жеңілдетілген несие беру жұмыстарына ықпал ету еді. Алайда, өз таңдауын жасаған сайлаушылар қалаған үміткеріне дауыстарын берді. Сайлау кезінде ешқандай құқық бұзушылық болмай, заңдылыққа сай өтті деп есептеймін. Енді, №9 сайлау округі бойынша депутат болған азаматқа сәттілік тілей отырып, өзінің сайлауалды бағдарламасының орындауына бар күш-жігерін жұмсайды деген сенім білдіремін. Өз ауылының дамуы үшін сайлаушылар да жаңа сайланған мәслихат депутатына қолдау көрсетеді деп ойлаймын.
Злиха БЕРКЕНОВА,
Қызылқоға аудандық мәслихат депутаттығына үміткер
