Дүниежүзілік балалар күнін 1954 жылы Біріккен Ұлттар Ұйымының Бас Ассамблеясы жариялады.
Осы орайда, жыл сайын 20-шы қараша күні бүкіл әлем бойынша балалар күнін атап өтеді.
1959 жылдың 20-шы қарашасында Бас Ассамблея Бала құқығы декларациясын, ал 1989 жылы - Бала құқықтары туралы Конвенцияны қабылдады. Сондай-ақ, 2000 жылы сегіз мақсаттан тұратын Мыңжылдық декларациясына қол қойылып, оның ішінде алты декларация балалардың қажеттіліктері туралы болды.
Олардың ішінде шектен тыс кедейлікті азайту, АҚТҚ/ЖҚТБ-ның таралуын тоқтату, жалпы бастауыш білім беру сынды мәселелер де бар. Сонымен қатар 20 қарашада балалар денсаулығы мәселелерін шешу жүктелген балалар дәрігерлері өздерінің кәсіби мерекесін атап өтеді.
Жалпы Қазақстан Республикасы кәмелетке толмағандардың денсаулығына асқан жауапкершілікпен қарайды. Сондықтан, 18 жасқа дейінгі балалар Міндетті әлеуметтік медициналық сақтандыру жүйесі негізінде азаматтардың жеңілдік берілген санатына кіреді.
2020 жылдың 1 қаңтарынан бастап елімізде енгізілетін Міндетті әлеуметтік медициналық сақтандыру жүйесі аясында олар МӘМС пакетіндегі барлық қызметтерді тегін, соның ішінде стоматологиялық көмек пен вакцинацияны да тегін алатын болады. Балалардың сирек кездесетін ауруларын емдеу үшін тегін дәрі-дәрмек көлемі екі есеге өсті. «Бұл күндізгі оқу бөлімінің студенттеріне де қатысты, олар мемлекет есебінен сақтандырылады. Яғни, мемлекет 18 жасқа дейінгі әрбір бала үшін және әр студент үшін ай сайын орташа жалақының 5 пайызын медициналық сақтандыру қорына аударатын болады», - деп атап айтты «Әлеуметтік медициналық сақтандыру қоры» КЕАҚ Атырау облысы бойынша филиалының директоры Байтолла Ғазизов.
«Әлеуметтік медициналық сақтандыру қоры» КЕАҚ Атырау облысы бойынша филиалы
Байланыс телефондары: 8/7122/ 956 936, 8/7122/ 956 931.
Бірыңғай байланыс нөмірі – 1406.
