Қазақстанның ауылды жерлерін дамыту – бұл тек ауылдық тұрғындардың өмір деңгейін жақсарту ғана емес, бүкіл елдің экономикалық және әлеуметтік прогресінің кепілі. Ауылдарда ауылшаруашылық өндірісін жетілдіру, инфрақұрылымды жаңғырту, білім беру мен денсаулық сақтау саласын жақсарту сияқты нақты қадамдар мен мемлекеттік бағдарламалар іске асырылуы тиіс.
"Ауыл аманаты" және "Ауыл – ел бесігі" сияқты бағдарламалар – ауылдардың инфрақұрылымын жаңартуға, жолдарды, сумен жабдықтауды, мектептер мен балабақшаларды жөндеуге, кәсіпкерлік пен ауыл шаруашылығын қолдауға бағытталған маңызды қадамдар. Сонымен қатар, ауылды дамытудағы басты мәселелердің бірі – ауылдағы жастардың жұмысқа тартылуы мен олардың ауылда тұрақтап қалуы. Жастардың ауылда жұмыс істеуі үшін жаңа мүмкіндіктер туғызу, кәсіби білім беру жүйесін жетілдіру, жергілікті кәсіпкерлікті қолдау маңызды.
Қазіргі заманғы ауыл – ол тек аграрлық өндірістің орталығы ғана емес, сонымен бірге мәдениет пен білімнің ордасы, экологиялық таза өмір салты мен тұрақты даму жолына түскен аймақ. Ауылдың дамуы – бұл ауыл тұрғындарының әлеуметтік әл-ауқатының жақсаруы, мәдени және экономикалық өмірдің жаңғыруы.
Ауылдың дамуы – ел дамуының маңызды бөлігі. Ол үшін барша қоғам болып күш біріктіріп, ауылды жаңартып, болашағына бағытталған қадамдар жасауымыз керек.
Нұрбек БАҒЫТЖАНОВ,
Махамбет аудандық Жастар ресурстық орталығы басшысының міндетін атқарушы
