Қазақстандықтар 52 шет мемлекетте 5 маусым күні өтетін референдумға қатыса алады. Шетелдегі ел өкілдіктері жанынан 65 учаскелік комиссия құрылған. Бұл жөнінде Сыртқы істер министрлігі ресми сайттарында хабарлады.
«ҚР шетелдегі мекемелерінде дауыс беру «Қазақстан Республикасындағы сайлау туралы» ҚР Конституциялық заңының 38-бабының 1-тармағына сәйкес референдум өткізілетін күні (2022 жылғы 5 маусым) жергілікті уақыт бойынша сағат 07:00-ден 20:00-ге дейін өткізілетін болады. Сонымен бірге, шетелдегі сайлау процесін уақтылы және толықтай дайындау мақсатында Қазақстан Республикасының азаматтарын жақын маңдағы сайлау учаскесіне алдын ала хабарласып, сайлаушылар тізіміне енгізу үшін мәлімет берулерін сұраймыз, делінген Министрлік хабарламасында.
Дауыс беруге сайлау құқығы бар, тиісті шет мемлекетте тұратын немесе жеке, қызметтік, іскерлік, туристік мақсатпен жүрген және ҚР азаматының жарамды паспорты бар Қазақстан Республикасының азаматтары учаскелік комиссия құрылған Қазақстанның дипломатиялық өкілдігіне жүгіне алады.
Елу екі елдегі учаскелік сайлау комиссияларының нөмірлері мен мекен-жайлары Сыртқы істер министрлігінің ресми сайтында орналасқан.
Гүлнар ЖОЛЖАН,
«Egemen Qazaqstan»
