Мемлекет басшысы Қасым- Жомарт Тоқаев Жолдауында ауылдық жерлерге басымдық беруді, ауылдарды дамытып көркейтуді, инфрақұрылымды жақсартып қана қоймай, мәдениет, білім ошақтарын көбейтуді тапсырған еді. Осы ретте ағылшын тілін үйренемін деген махамбеттіктер үшін жағымды жаңалық. Жуырда аудан орталығында ағылшындықтардың өзі келіп дәріс беретін орталық ашылды. Оның басшысы небары 19 жастағы жас кәсіпкер – Ерасыл Еркінғалиев.
Бүгінде ағылшын тілін меңгеру заман талабы ғана емес, әлемдік кеңістікте табысты болудың басты қадамдары десек болады. Орталық жетекшісінің де мақсаты – шетелдік мамандарды жұмысқа шақыру арқылы ауыл жастарына қолжетімді мүмкіндік беріп, тіл үйренуге қызығушылықтарын ояту.
Бұған дейін көршілес Исатай ауданында ашылған орталықтың ауыз толтырып айтарлықтай жетістіктері жетерлік. 2023 жылдан бері екі жүзден астам шәкірт дайындап, күні бүгінде бір айда сексеннен астам баланы оқу бағдарламасымен қамтып отыр. Шәкірттерінің арасында үшеуі Атырау PetroTechnic жоғарғы колледжіне грантқа оқуға қабылданса, бір оқушы ағылшын тілнде өткен республикалық дебаттан орын алып келген. Қысқа мерзімде осындай үлкен жетістіктерге қол жеткізген орталық жетекшісі Ерасыл Дарынұлы – тіл үйрену мақсатында шетел асып білім алып келген жерлесіміз.
– 7-8 сыныпта оқып жүргенде ағылшын тілін оқуға қызыға бастадым. Жанымдағы достарыммен Mac.Donalds сынды шетелдік сауда орталықтарына телефон соғып, ағылшынша сөйлесетінбіз. Ауылда өзімнен төмен сыныптың балаларына қосымша дәріс беріп, тіл үйрете бастадым. Уақыт өте балалармен жұмыс жасау қабілетім де қалыптасты деуге болады. Сөйтіп, мектеп бітірген соң ойланбастан, Нью-Йоркке білім қуып кеттім. Сол жақта бір жылдан астам болып, тәжірибе жинадым. Осы уақыт аралығында түсінгенім – бір кездері мен сияқты қарапайым ауыл баласына шетелдік азаматтан білім алу мүмкін емес болып көрінді. Ал, қазір мен өзімнің бала күнгі арманымды біртіндеп жүзеге асырып, басқа балаларға, тіпті ересектерге осындай қолжетімді орталық ашып отырмын. Мұндағы мамандардың бәрі – бірнеше жылдық еңбек өтілі бар, осы саланы толық меңгерген, аудиториямен жұмыс жасай алатын білікті лингвист мұғалімдер. Біздің басты мақсатымыз – білімге, тіл үйренуге құштар жандарға қолдау көрсету және олардың арман-мақсаттарын жүзеге асыруға жол ашу,-дейді жас кәсіпкер Е.Еркінғалиев.
Махамбет ауданындағы шетелдік мамандар сабақ беретін ағылшын тілін үйрену орталығының ашылуына аудан әкімінің орынбасары Асхат Аймұратов та қатысып, құттықтау сөзін арнады. Сонымен қатар, аудандық кәсіпкерлік және ауыл шаруашылығы бөлімінің басшысы Олжас Мырзабаев та қатысып, жас кәсіпкердің бастамасына сәттілік тіледі.
Ерасылдың кәсібі заңды тіркелген және өзінің бірнеше адамнан құралған командасы бар. Тілдік курстың арнайы бағдарламасы да ата-аналарға арнайы ұсынылады. Курс бағасы қолжетімді әрі жас ерекшелігіне қарай топтарға бөлініп, оқытылады. 3-сынып оқушысынан бастап, егде жастағы адамдарға дейін келуге рұқсат. Бұған дейін Исатай ауданында жасы алпыстан асқан зейнеткер орталықтың ең үлкен шәкірті болған екен. Білім алудың кеш еместігіне дәлел осы болса керек. Ауыл баласына тіл меңгеруді мектепте ғана емес, қосымшада қолжетімді етем деген Ерасылдың бастамасымен біз де құттықтадық. «Өзге тілдің бәрін біл, өз тіліңді құрметте» деген ұранмен жас та болса, қос ауданды қамтып, арнайы мамандармен жұмыс жасап отырған орталық жақсы нәтиже көрсетеріне сенеміз.
А.САТАЕВА
